Reprezentante povu husu Governu kontrola produtu importadu kontamina ho Formalin
DILI, 11 janeiru 2024 (TATOLI)—Reprezentante povu iha uma fukun Parlamentu Nasionál (PN) liuhosi Deputada PD, Maria Teresa Gusmão, husu Governu liuhosi entidade relevante atu kontrola produtu importadu hanesan naan-karau, fahi, ikan, ayam potong no boek ne’ebé kontamina ho Formalin.
Notísia Relevante: Investigadór deteta kontaminasaun formalin iha na’an, ikan no boek importadu
“Produtu importasaun hanesan naan fahi, ikan, boek kontamina ho Formalin, ida-ne’e realidade. Saúde iha ema ida-idak nia liman. Husu Ministériu Komérsiu no Indústria (MKI) atu haree produtu sira-ne’ebé atu tama no estabelese mós ita-nia laboratóriu nasionál ida hodi deteta hahan sira-ne’e,” nia hateten ba Agência Tatoli iha uma fukun PN, kuarta ne’e.
Tuir Deputadu membru komisaun F trata asuntu Saúde, Seguransa Sosiál no Igualidade iha PN ne’e hateten, haree ba saúde públika importante tebes nune’e ministériu ka entidade relevante bele hahú haree ona kualidade produtu.
Tanba, Formalin afeta tebes ba saúde hanesan ba futuru kauza moras kankru, nune’e ba família ida-idak bele maneza hili hahán saudável hodi prevene moras oioin.
Iha parte seluk, Deputadu FRETILIN, António Calau, husu Autoridade Inspesaun Fiskalizasaun Ekonomia no Sanitária Institutu Públika (AIFAESA) atu halo inspesaun regirozu ba supermerkadu sira hodi garante kualidade produtu ba konsumidór sira.
“Inspesaun ba supermekadu tanba foin lalais akontese iha supermerkadu iha Comoro, ne’ebé ita-nia komunidade ba hola ikan depois lori ba uma ikan ne’e ulár no hodi fila-fali mai loza ne’e. Depois, ita tun ba fiskalizasaun ikan jelera ida-ne’e ular hotu kedas, oinsá ho intevensaun Governu nian atu halo inspesaun regirozu ba supermerkadu sira, atu nune’e bele haree hahan sira ne’ebé liu prazu ona, ita labele husik fatin hodi fó impaktu ba povu,” nia hateten.
Jornalista : Nelson de Sousa
Editór : Cancio Ximenes
