DILI, 11 janeiru 2024 (TATOLI)–Vítima inséndiu kuarentena Tasi-Tolu iha família ka uma-kain 38 ne’ebé evakua no hela iha Lanud-Bairru Pite ne’e agora konkorda ho IX Governu Konstitusionál atu re-integra sira ida-idak ba munisípiu sira-nia moris fatin.
Notísia Relevante: Deskonfia sirkuitu elétriku, ahi-han kuarentena Tasi-Tolu
Inséndiu ka ahi-han uma kuarentena iha Tasi-Tolu, entre Bairru BTN II ho BTN III, aldeia Terra-Santa, suku Madohi, postu administrativa Dom Alexo, munisípiu Díli, akontese iha kinta (23 fevereiru 2023) tanba deskonfia sirkuitu elétriku.
Inséndiu ne’e akontese iha tuku 19h20 no ekipa Bombeirus halo kedan intervensaun iha tuku 20h30 hodi tenta hamate ahi, maibé la konsege tanba prezensa ekipa Bbombeirus tarde, no iha inséndiu ne’e rezulta uma-kain hamutuk 50 ne’ebé okupa uma kuarentena no la konsege salva sasan uma laran no pasiénsia halai de’it ho ruopa iha iha isin lolon de’it.
“Foin lalais ne’e Governu liuhosi Ministériu Administrasaun Estatal, mai foti ona dadus hanesan konta bankária, maibé ami hein seidauk serteza. Sira mai iha ne’e hodi dehan ba ami atu hamamuk fatin iha kinta (28/12/23). Maibé, to’o agora nafatin de’it, hein de’it desizaun hosi Governu,” Vítima inséndiu Kuarentene Tasi-Tolu, Alberto da Crus, hateten ba Agência Tatoli, iha Lanud-Bairru Pite, kuarta ne’e.
Alberto da Crus hateten, vítima hotu-hotu iha ne’e konkorda no hakarak fila ba sira-nia munisípiu iha sira-nia moris fatin.
Vítima Juliana de Jesus sente triste hela iha fatin refujiadu tanba susar atu hala’o moris no buat hotu susar atu la’o, tanba ne’e nia husu ba Governu atu aselera planu hadi’a uma no buka fatin ida ba sira atu sira bele hela no buka moris.
“Ami hela iha ne’e falta fulan ida atu halo tinan ida ona, tanba ne’e ami hakarak atu fila ba ami-nia fatin hodi buka moris tanba iha ne’e sei la halo buat ida. Labarik ba eskola dook mós presiza osan, hosi Bairru Pite ba Tasi-Tolu,” Juliana de Jesus dehan.
Nune’e, tersa (10/01/2024) horisehik, Governu liuhosi Sekretáriu Estadú Protésaun Civíl (SEPC, sigla portugés), Domingos Mariano Reis, hamutuk ho Sekretáriu Estadu Dezenvolvimentu Lokál (SEDL), Mateus dos Santo Tallo, hala’o ona koordenasaun hamutuk ho família vitima uma-kain 38 ne’ebé mak afetatadu ba inséndiu Tasi-Tolu, ne’ebé mak daudaun ne’e hela iha coube house, besik Palásiu Prezidénsiál Nicolao Lobato-Bairru Pitete, atu fila hikas ba ida-idak nia munisípiu nune’e bele husik ona fatin refere.
Família vítima sira-ne’ebé mak afeita ba inséndiu ne’e, Governú liuhosi SEPS rekupera hotu ona materiál konstrusaun ba kada família ida-idak no husu atu husik ona fatin refere ba iha ida-idak nia munisípiu.
Notísia Relevante: APC aprosima ona vítima inséndiu Karantina hodi dezloka bá munisípiu
Jornalista : Osória Marques
Editór : Cancio Ximenes
