Ai-moruk item 12 iha armazein Servisu Saúde Viqueque stoke hotu
VIQUEQUE, 12 janeiru 2024 (TATOLI)—Ai-moruk iha armazein Servisu Saúde munisípiu Viqueque iha item 183, ne’ebé daudaun ne’e iha item 12 mak stock hotu.
“Ai-moruk foin lalais tama filafali, ne’ebé balun ami distribui ona ba sentru saúde sira, maibé ai-moruk tipu 12 maka laiha, ha’u seidauk konfirma didi’ak. Ai-moruk sira-ne’ebé nesesidade liu ba atendimentu pasiente sira daudaun sufisiente,” Diretór Servisu Saúde munisípiu Viqueque, Pedro Ferreira da Silva, informa ba Agência Tatoli, iha ninia knaar fatin, Viqueque Vila, sesta ne’e.
Enkuantu, stock ai-moruk iha postu saúde sira agora sufisiente, balun maka laiha.
“Viqueque iha sentru saúde lima no postu saúde 43, ne’e ita-nia stock ai-moruk iha hela hodi fó tratamentu ba abintante sira-ne’ebé moras. Ami haree stock hotu mak ami sei halo pedidu ba nasionál hodi distribui,” nia akresenta.
Notísia relevante : Pasiente husu MS rezolve ai-moruk no Ministra Elia hatan
Tuir dadus ne’ebé Agência Tatoli asesu, ai-moruk ne’ebé daudaun iha armazein Servisu Saúde Viqueque hamutuk item 183 kompostu hosi antibiótiku, ai-moruk mental, STI, analisis ho anti inflasi, kreme, xarope no injesaun.
Enkuantu, ai-moruk item 12 ne’ebé hotu kompostu hosi acetylasalicylic acid tablet, albendazole Chewable scored, aluminium hydroxide tablet, azithromycine teblet, Cefixime trihydrate capsule, clotrimazole Vaginal tablet (or passary with applcator), hyoscine butylbromide tablets, metoclopramide tablet, multivitamin tablet, multivitamin oral liduid, prednisolone tablet no prednisolone tablet.
Jornalista : Vitorino Lopes da Costa
Editora : Julia Chatarina
