DILI, 12 janeiru 2024 (TATOLI)—Autoridade Inspesaun no Fiskalizasaun Atividade Ekonómika Sanitária no Alimentár, Institutu Públiku (AIFAESA,I.P) nia atividade diáriu halo fiskalizaun no inspesaun ba instalasaun komersiál sira paradu provizóriamente.
Inspetór Jerál AIFAESA, I.P, Ernesto Monteiro, hateten, atividade paradu desde tama tinan foun tanba funsionáriu tékniku nia kontratu termina hotu iha tinan 2023 nia rohan.
“Ita-nia funsionáriu kontratadu hamutuk 118 kontratu ramata ona iha loron 31 dezembru 2023. Sira agora seidauk bele tama fali serbisu hodi hala’o atividade rutina hanesan halo fiskalizasaun no inspesaun ba loja sira tanba seidauk iha desizaun extende sira-nia kontratu,” Inspetór Jerál institutu informa ba Agência Tatoli, iha nia knaar fatin, Matadouro, sesta ne’e.
Notísia relevante : MKI no AIFAESA, I.P kontinua monitoriza ai-han importasaun kontamina formalin
Daudaun ne’e iha de’it Inspetór Jerál, Sub-Inspetór Jerál, Auditóriu Interna inklui funsionáriu permanente rua mak serbisu hodi asegura funsionamentu institutu.
Parte inspetór hato’o ona situasaun funsionáriu sira ba ministériu tutela, maibé daudaun ministru iha hela rai-li’ur.
“Ita koordena ona ho ministériu tutela kona-ba kontratu funsionáriu sira-nian ramata ona no ita mós fahe ona notifikasaun ba funsionáriu kontratadu sira, katak hein bainhira atu bolu fali mak mai asina kontratu tanba sei hein desizaun hosi Ministériu Koordenadór Asuntu Ekonómiku (MKAE),” nia tenik.
Inspetór Jerál konsidera serbisu AIFAESA,I.P ne’e importante no presiza tebes rekursu umanu tanba Governu aprova ona orsamentu ba servisu institutu nian kona-ba deskonsentradu ba munisípiu ka servisu iha munisípiu Baucau, Bobonaro, Covalima no Rejiaun Administrativa Espesiál Oé-cusse Ambeno (RAEOA).
“Ha’u hanoin ba servisu AIFAESA,I.P nian, karik funsionáriu kontratadu 118 ne’e mai hotu fali mós rekursu umanu la to’o nafatin tanba tinan ne’e servisu institutu mak deskonsentradu ba musípiu balun, tanba ne’e presiza ema. Maibé desizaun hotu iha MKAE nia liman,” nia hato’o.
Jornalista : Arminda Fonseca
Editora : Julia Chatarina
