DILI, 12 janeiru 2024 (TATOLI)—Deputadu bankada CNRT iha Parlamentu Nasionál (PN), Patrocínio Fernandes dos Reis, enkoraja timoroan hotu atu kuda ai-kameli barak liután ne’ebé iha valór ekonómku iha tempu oin mai.
Notísia Relevante: Governu sei selebra loron nasionál Ai-kameli tinan ne’e iha Manatuto
“Ai-kameli bele dehan rekursu ida mós Timor-Leste nian ne’ebé iha parte ekonomia, entaun atu komemora loron nasionál ai-kameli ita hein no husu katak timoroan hotu-hotu iha hanoin atu dezenvolve ai-kameli iha ita-nia rain, hodi bele dudu ka ajuda ita-nia ekonomia,” nia hateten ba jornalista sira iha uma fukun PN relasiona ho komemorasaun komemorasaun loron Nasionál Ai-kameli ne’ebé kada tinan sei komemora iha 13 janeiru, sesta ne’e.
Reprezentante povu ne’e mós husu ba Governu atu investe makaas hodi bele promove di’ak liután ai-kameli kuda iha fati-fatin iha territóriu nasionál.
“Agora, Governu nia responsabilidade mós atu haree oinsá investe makaas iha parte agrikultura liuliu iha floresta hodi bele promove di’ak liután ai-kameli, buka kuda iha fati-fatin ne’e hanesan mós fonte ekonomia ida ba ita-nia rain,” nia hateten.
Tanba, tuir nia, ema hotu hatene ai-kameli nia folin iha merkadu di’ak no bele sai hanesan fonte ba aban bainrua ba exportasaun karik ai-kameli, TL nia rekursu naturál karik iha pontensialidade ekonomia makaas atu bele kontribui iha rai-laran.
Enkuantu iha VI Governu Konstitusionál liuhusi reuniaun Konsellu Ministru hili ona, 13 janeiru, nu’udar Loron Nasionál ai-kameli no Floresta nian.
Objetivu mak atu fó atensaun liu ba kna’ar sentrál floresta nian iha manutensaun ba ambiente ida-ne’ebé saudável, iha konservasaun diversidade balada no ai-horis sira-nian, no iha dezenvolvimentu ekonómiku liuliu ba ai-kameli, rekoñese ona hanesan ai-horis emblemátika ne’ebé ho valór nasionál nian.
Jornalista : Nelson de Sousa
Editór : Cancio Ximenes
