DILI, 12 janeiru 2024 (TATOLI) – Profesór 16 ne’ebé hanorin dixiplina matemátika, inglés, portugés no desportu iha Eskola Bázika Sentrál (EBC, sigla portugé) Farol termina ona kontratu, nune’e eskola refere sei enfrenta problema ba falta manorin.
Diretora EBC Farol, Filomena Freitas, admite katak iha prosesu aprendizajen ne’ebé sei hahú iha próxima segunda-feira ne’e eskola sei laiha manorin ba dixiplina importante sira ne’e.
“Ha’u konsidera dixiplina importante haat ne’ebé maka tama iha ezame nasionál ne’e maka agora laiha hotu ona profesór. Ami halo ona proposta ba ministériu atu koloka profesór permanente mai iha eskola ne’e, maibé to’o ohin loron laiha resposta ida”, dirijente ne’e dehan.
Diretora haktuir mós katak eskola Farol falta profesór hahú kedan husi tempu Governu Dahituk nian no agora ministériu hasai tan manorin benefisiáriu hamutuk na’in-16 ne’ebé durante ne’e apoia maka’as ba atividade ensinu aprendizajen ba estudante rihun 2-resin.
Manorin sira ne’ebé la kontinua serbisu ne’e profesór da turma hotu, kompostu husi primeiru no segundu siklu iha na’in-lima, sétimu anu rua, oitavu anu hitu no nonu anu rua.
Diretór Edukasaun Munisípiu Dili, Carlito da Silva, salienta katak tuir informasaun ne’ebé maka eskola Farol aprezenta kona-ba dadus profesór ne’ebé menus dezde Sétimu Governu. “Loloos hetan tiha ona resposta, maibé lahatene tanba saida maka la rezolve to’o ohin loron. Ida ne’e Ministériu Edukasaun tenke toma desizaun”, afirma.
Nia salienta pedidu eskola Farol nian ba ME lahetan resposta no agora tama ba 2024 hapara tan dosente 16 ne’ebé apoia husi kontribuisaun inan no aman sira ne’e. Tuir Carlito, karik ME iha ona planu di’ak ruma atu hadi’a edukasaun iha eskola Farol ne’e, tanba daudaun enumeradór na’in-60 rekolla hela dadus iha terrenu, maibé seidauk aprezenta relatóriu.
“Atividade eskola sira hotu tuir kalendáriu sei hahú iha segunda, 15 janeiru. Fiar katak eskola Farol sei hetan kolokasaun profesór permanente hodi apoia ba iha dixiplina haat importante”, nia espera.
Dirijente ne’e mós husu ba diretora eskola ho nia koordenadór eskola filiál sira atu kontinua hakmatek hodi fó fiar ba ministériu, nune’e sira bele buka solusaun hodi koloka fali profesór sira iha prosesu aprendizajen ne’ebé maka sei hala’o iha eskola refere.
Notísia relevante: EBC Farol devolve osan matríkula hamutuk $21.992 ba inan-aman estudante
Jornalista: Tomé Amado
Editora: Maria Auxiliadora
