OÉ-CUSSE, 12 janeiru 2024 (TATOLI) – Ministériu Komérsiu no Indústria (MCI, sigla portugés), sesta ne’e hala’o desiminasaun ba Lei númeru 14/2022, loron 21 dezembru, kona-bá direitu autór no direitu koneksu ba komunidade artista, kultura, no estudante sira iha Rejiaun Administrativa Espesiál Oé-Cusse Ambeno (RAEOA).
Notisia relevante: PN aprova projetu-lei Kódigu Direitu Autór iha faze jeneralidade
Koordenadór Gabinete Apoia Jurídika MCI, Gregorio da Silva, hateten, desiminasaun ne’e importante ba sidadaun hotu, liuliu ba sira-ne’ebé kriadór obra literasia sira hanesan, monografia, teze, disertasaun, públikasaun ba livru revista, artigu, reportajen, no eskrita seluk-tán.
“Tan ne’e maka desiminasaun ohin ne’e nia alvu ba ema sira-ne’ebé kriadór badaen sira, hanesan kantór sira, dezeñadór, artezenatu, sira-ne’ebé halo filmazen no fotografia, sira-nia direitu maka proteje,” Gregorio da Silva, ko’alia iha ámbitu desimansaun ne’e, iha Otél Ambeno Oé-Cusse.
Objetivu hosi diseminasaun ne’e, atu habelar informasaun kona-bá Lei ne’e refere, tanba lei ne’e nia objetivu maka atu halo protesaun no regula sira-ne’ebé kriadór ka intelektuál badaen sira-nian, ne’ebé durante ne’e iha.
Sekretáriu Rejionál ba Asuntu Komérsiu no Indústria sesante, Pedro da Silva Boquifai, agradese ba MCI, tanba liuhosi desiminasaun ne’e bele tulun kriadór sira iha Oé-Cusse kona-bá diretu autór no direitu koneksu.
“Ha’u reprezenta Autoridade RAEOA, ami hato’o agradese, tanba asuntu sira-ne’e, importante ba ita hotu, atubele hatene, tanba durante ne’e ita haree no observa kriadór komesa barak, tán ne’e liuhosi desiminasaun tulun ita atu komprende oinsá respeita obra ema seluk nian,” nia agradese.
Notísia relevante: Komisaun G konvida entidade relevante diskute projetu-lei kódigu direitu autór
Jornalista: Abílio Elo Nini
Editor: Evaristo Soares Martins
