DILI, 12 janeiru 2024 (TATOLI) – Eskola públika iha territóriu labele suku farda ba alunu sira tanba Ministériu Edukasaun (ME) mak sei prepara farda ho motif tais hodi suku ba saia, kalsa no kamiza.
“Uniforme ba estudante eskola públika sira ne’e ita sei deside bazeia ba kores no motif tais ne’ebé sei suku ba saia no kalsa no ba kamiza. Estudante sira sei uza koris mutin ho folin ne’ebé baratu”, Ministra Edukasaun, Dulce de Jesus, hatete iha Lecidere, ohin.
Ministériu Edukasaun hasai ona sirkulár rua ba eskola públika iha territóriu atu labele kobra osan husi inan no aman sira suku farda ba alunu sira iha tinan 2024 ne’e.
Desizaun ministériu nian hodi bandu eskola sira labele kobra osan ba farda ho razaun atu labele hatodan gastu ne’ebé boot ba inan no aman sira.
“Ami haree ona iha eskola públika barak mak antes ne’e suku ona farda, depois obriga inan no aman sira tenke sosa ho presu ne’ebé karun. Ami konsidera ida ne’e kontinu hatodan sira, tanba dalaruma familia ida iha oan na’in-rua ka tolu mak eskola iha fatin ida no laiha kapasidade atu sosa farda sira”, ministra dehan.
Tanba ne’e, ME mak sei prepara farda nia amostra iha kada eskola sira, inklui alfaiate, nune’e bele fasilita inan aman sira suku bazeia ba modelu ba kada estudante.
Ministra Dulce husu ba eskola hotu atu kontinua hein desizaun ba suku farda foun, maibé nia solisita ba eskola sira bele uza lai uniforme ne’ebé iha ona ba estudante tuan sira no ba foun bele uza farda metan no mutin hodi hein farda foun ne’ebé sei mai iha tempu besik.
Notísia relevante: ME proíbe eskola kobra osan hodi suku uniforme ba alunu sira
Jornalista: Tomé Amado
Editora: Maria Auxiliadora
