VIQUEQUE, 12 janeiru 2024 (TATOLI)—Diretór Servisu Saúde munisípiu Viqueque, Pedro Ferreira da Silva, hateten, daudaun ne’e iha pesoál na’in-102 nia kontratu la kontinua, nune’e difikulta atendimentu iha postu saúde haat.
“Iha munisípiu Viqueque pesoál saúde ne’ebé agora kontratu hotu hamutuk na’in-102, nune’e ami horiseik hato’o pedidu ba ministériu hodi fó kontinuasaun kontratu ba pesoál saúde ne’ebé kontratu hotu tanba iha Viqueque, postu saúde haat maka mamuk, agora destaka pesoál saúde ida ba kada postu saúde hodi halo atendimentu ba abitante sira,” Pedro Ferreira, informa ba Agência Tatoli, iha postu Viqueque Vila, sesta ne’e.
Postu saúde ne’ebé pesoál sira-nia kontratu ramata mak hanesan Uetali suku Uma-Uain Kraik, postu saúde Bibileo rua no Saneho postu Lacluta.
“Ami hein Ministériu Saúde nia desizaun atu kontinua kontratu ba pesoál saúde sira ka loke rekrutamentu foun. Tanba ita koloka ona pesoál saúde ba fatin mamuk sira, maibé ita haree atendimentu maka la másimu,” nia hato’o.
Notísia relevante : Postu saúde rua iha Viqueque enfrenta problema rekursu umanu
Nune’e, Diretór iha esperansa katak Ministériu Saúde bele aselera prosesu.
“Ami mós propoin ona atu kontinua fó kontratu ba ema na’in-102. Karik ministériu atu loke rekrutamentu, tenke aselera atu ita bele koloka ba postu saúde sira,” nia tenik.
Daudaun sentru saúde lima ho ninia postu saúde 43 nia prosesu atendimentu ba abitante sira iha munisípiu Viqueque la’o normál, maski ho limitaadu pesoál saúde.
Tuir dadus, pesoál saúde ne’ebé serbisu iha sentru saúde no postu saúde 43 kompostu hosi rejime jerál, rejime espesiál aliadu, asistente enfermeiru, médiku, parteira ho totál na’in-423, ne’ebé na’in-102 ho estatutu kontratadu.
Jornalista : Vitorino Lopes da Costa
Editora : Julia Chatarina
