PNTL sei maximiza servisu tránzitu to’o postu administrativu sira iha 2024
OÉ-CUSSE, 12 janeiru 2024 (TATOLI) – Polísia Nasionál Timor-Leste (PNTL) liuhosi Departamentu Tránzitu no Seguransa Rodaviáriu (DTSR), fó-sai katak, iha tinan 2024 ne’e, servisu tránzitu sira iha munisipíu 13 inklui RAEOA kobre to’o nível aldeia no postu administrative sira.
Notísia relevante:PNTL rejista ema na’in-86 lakon vida iha 2023
Xefe Departamentu Tránzitu no Seguransa Rodaviáriu (DTSR), Superintendente Asistente Polísia, Luís da Costa, relata, iha ámbitu sensibiliza utilizasaun sinál tránzitu iha estrada públiku ba motorista sira iha Rejiaun Administrativa Espesiál Oé-Cusse Ambeno (RAEOA), kinta ne’e.
Nia dehan, durante ne’e servisu tránzitu koopera ho DNTT kona-bá dokumentu transporte sira, karta kondusaun no mós lisensa sira, tanba ne’e, kompeténsia másimu DNTT nian.
“Realidade akontese servisu tránzitu ne’e, konsentra de’it iha munísipiu, iha eskuadra postu administrativu sira-ne’e, ita la haree, tanba iha eskuadra balu, ha’u vizita billete infrasaun ne’e, tinan ida nia laran sei tomak hela, la aplika,” Luís da Costa, hateten.
Maibé liu iha eskuadra postu administrativu sira-ne’e, ema la uza kapasete, maibé prontu kestaun família, tan ne’e maka sai hanesan impaktu boot ida, atubele implementa lei kódigu estrada.
“Tan ne’e maka ha’u-nia fó orientasaun ba iha xefe sesaun munísipiu 14, iha 2024 ne’e, oinsa atubele maximiza servisu tránzitu ne’e, bele to’o iha postu administrativu sira, ita espera, implementa servisu tránzitu iha postu administrativu sira, ita fiar katak, iha tinan ida, bele hetan millaun $1-resin ba iha reseita Estadu,” nia promete.
Notísia relevante:DNTT sensibiliza sinál tránzitu iha Oé-Cusse, atu hametin disiplina no prevene asidente
Maske nune’e, nia rekoñese, iha munísipiu maka konsege rekolla reseita ba kofre Estadu barakliu, no komandu sei atribui sertifikadu apresisaun iha tempu badak.
“Servisu tránzitu iha munísipiu 14 durante ne’e la’o kapaas tebes, komandu jerál operasaun fó ona orientasaun ba ha’u katak, iha tempu badak mós sei fó sertifikadu ba iha komandu PNTL munísipiu lima, ne’ebé maka reseita durante tinan 2023, hetan barak,” nia informa.
Nia esplika, atribuisaun sertifikadu ne’e, nu’udar motivasaun ba ita-nia PNTL sira iha munisipíu sira-seluk, bele esforsa atu kontinua implementa lei kódigu estrada sira, ne’bé maka atribui iha polísia tránzitu iha munisipíu 14.
Nia hateten, iha 2023, ita hetan rihun $800-resin mak konsege hatama ba iha kofre Estadu, iha tinan ne’e mós, infratór sira barak maka la selu.
Maibé iha tabela koima ne’e, RAEOA nia kompleta selu hotu, maibé munísipiu barak maka infratór sira seidauk selu.
“Tan ne’e maka ita ko’alia ona ho DNTT, oinsa bele loke servisu balu iha asuntu tékniku, nune’e parte tránzitu bele asesu, karik infratór sira, halo infrasaun ita bele asesu sira-nia dokumentu,”
Tanba durante ne’e, iha kazu barak akontese iha munísipiu sira, infratór sira lakohi ba selu, maibé ba halo karta kehilangan ba iha polísia eskudra, depois aprezenta karta ne’e ba iha DNTT hodi prodús dokumentu, karta kondusaun no dokumentu karreta no motorizada.
“Tinan ida-ne’e mós, ita orienta ona ba iha xefe sesaun tránzitu munisípiu 14, atu rejista infratór sira, ne’ebé maka seidauk selu, bele manda hotu ba nasionál, depois ita bele enkamiña ba iha DNTT, atu blokeia tiha sira-nia dokumentu sira-ne’e, tempu badak ita sei halo ida-ne’e,”
Notísia relevante:DNTT sei halo inskrisaun ba motorizada ne’ebé seidauk iha dokumentu
Jornalista: Abílio Elo Nini
Editor: Evaristo Soares Martins
