TIC Timor no MJ hakarak inisia aplikasaun online trata dokumentu pesoál
DILI, 12 janeiru 2024 (TATOLI)—Ajénsia Teknolojia Informasaun no Komunikasaun, Institutu Públiku hodi (TIC Timor, I.P) no Ministériu Justisa (MJ) hakarak inisia aplikasaun online hodi trata dokumentu pesoál, nune’e bele fasilita sidadaun sira.
“Ami kria tiha ona sistema iha tempu badak halo lansamentu, sistema ne’e bolu naran ajendamentu trata dokumentu pesoál hanesan pasaporte, billete identidade, sertidaun no bom komportamentu,” Diretór Ezekutivu Ajénsia TIC Timor, I.P, Venâncio Pinto, hateten ba Agência Tatoli, iha ninia knaar fatin, Palásiu Governu, sesta ne’e.
Notísia relevante : TIC Timor prefere kria lei protesaun dadus pesoál molok estabelese identidade únika
Sistema ne’e sei atende ema hodi rejista kada loron na’in-140, kompostu hosi dadeer hosi tuku 08:00-12:00 atende na’in-70 no lorokraik tuku 14:00-17:00 atende na’in-70.
“Bainhira la konsege rejista iha dadeer bele ba fali lorokraik, liu oras ne’ebé determina maka tenke hein fali aban no rejista foun tanba bainhira rejista hotu iha barcode no númeru rejista (númeru antrian) hodi ba hatudu. Prosesu rejista ne’e sei hatama númeru kartaun sira hanesan kartaun billete identidade no sertidaun bainhira ba to’o fatin mak lori dokumentu orijinál hodi hatudu hodi avansa hodi ba trata dokumentu sira ne’ebé presiza,” nia akresenta.
Sistema ne’e daudaun iha faze teste hela no bainhira loos ona maka sei lansa iha tempu badak, posibilidade iha fulan-janeiru ne’e tanba prosesu hotu finaliza ona.
“Intensaun kria sistema ka rejista online ne’e hodi evita forma naruk iha espasu públiku,” Diretór tenik.
Jornalista : Antónia Gusmão
Editora : Julia Chatarina
