TIC Timor prefere kria lei protesaun dadus pesoál molok estabelese identidade únika
DILI, 12 janeiru 2024 (TATOLI)—Diretór Ezekutivu Ajénsia Teknolojia Informasaun no Komunikasaun, Institutu Públiku (TIC Timor, I.P), Venâncio Pinto, hateten, razaun seidauk implementa estabelese identidade únika tanba iha ona planu atu kria uluk lei protesaun dadus pesoál.
“Identidade únika seidauk implementa ho razaun katak ita seidauk iha lei protesaun dadus pesoál, bainhira ita ko’alia úniku ID, ita ko’alia dadus pesoál, bainhira lei laiha hodi asegura dadus sira ne’e depois to’o ikus sai iha públiku sé mak responsabiliza,” Venâncio Pinto, informa ba Agência Tatoli, iha ninia knaar fatin, Palásiu Governu, sesta ne’e.
Tanba ne’e, institutu públiku ne’e hamutuk ho Ministériu Justisa sei diskute uluk lai lei protesaun dadus pesoál, nune’e bainhira aprova ona maka hakat ba identidade únika.
“Identidade únika ne’e ein termu tékniku iha TIC, maibé nia legalidade ne’e iha Ministériu Justisa. Maibé atu kontinua implementa depende ba konkordánsia ema polítiku sira,” nia akresenta.
Notísia relevante : TIC Timor sei kria sistema dijitál identidade únika iha Timor-Leste
Tuir Diretór, bele implementa buat hotu maibé bainhira laiha lei ida hodi proteje, ikus mai sei mosu problema ruma no laiha ema ruma atu reklama.
“Vantajen identidade únika ne’e boot tanba ho de’it númeru ida bele asesu ba buat hotu maibé tenke iha lei ida bele proteje,” Diretór tenik.
Antes ne’e, iha mandatu VIII Governu, ezekutivu sira liuhosi reuniaun Konsellu Ministru aprova projetu deliberasaun kona-ba autorizasaun despeza no autorizasaun hodi loke prosedimentu aprovizionamentu ba adjudikasaun kontratu akizisaun servisu jestaun ezekusaun estratejia ba implementasaun Sistema Identifikadór Úniku.
Projetu deliberasaun ne’e aprezenta hosi Primeiru-Ministru, Taur Matan Ruak, ne’ebé ho definisaun tipu prosedimentu atu adota no autoriza selebrasaun kompromisu plurianuál relasiona ho ezekusaun kontratu ne’ebé atu adjudika.
Ho aprovasaun ne’e, autoriza mós TIC Timor atu jere ezekusaun estratejia ba implementasaun sistema identifikadór úniku iha rejime plurianuál.
Jornalista : Antónia Gusmão
Editora : Julia Chatarina
