DILI, 14 janeiru 2024 (TATOLI)—Autoridade Inspesaun no Fiskalizasaun Atividade Ekonómika Sanitária no Alimentár, Institutu Públiku (AIFAESA, I.P), tinan ne’e sei hetan apoiu laboratóriu móvel hosi Governu Indonézia.
Notísia Relevante: AIFAESA,I.P nia atividade paradu provizóriamente tanba funsionáriu 118 termina kontratu
“Tinan ne’e, Instituisaun Badan Pengawas Obat dan Makanan (BPOM) Indonézia sei oferese laboratóriu movél mai ita liuhosi Kedutaan Besar Republik Indonesia (KBRI) iha Timor-Leste. Ida-ne’e, atu apoiu servisu AIFAESA, I.P nian iha terrenu hodi halo inspesaun no fiskalizasun ba atividade ekonómiku nian,” Inspetór Jerál AIFAESA, I.P, Ernesto Monteiro, hateten ba Agência Tatoli liuhosi telefónika, domingu ne’e.
Laboratóriu movél ne’e hanesan karreta ida maibé funsiona hanesan laboratóriu ne’ebé bele halai ba-mai (movél) iha terrenu halo teste ba produtu kualidade.
“Ida-ne’e ita presiza tebes, tanba bele ajuda ita halo kedas teste ba produtu sira iha terrenu. Loloos ne’e laboratóriu movél ne’e rasik mai antes maibé tanba ita seidauk iha edifísiu laboratóriu, entaun planu ne’e mai fali iha tinan ne’e, tanba Orsamentu Jerál Estadu (OJE) 2024 mós aprova ona orsamentu atu harii laboratóriu AIFAES, I.P ne’e,” nia dehan.
OJE 2024 aloka ba AIFAESA, I.P hamutuk millaun $2.4-resin ne’ebé foku ba atividade prioridade tolu mak hanesan konstrusaun reabilitasaun ba uma laboratóriu ho nia moru iha Tibar, servisu deskonsentradu ba munisípiu tolu Baucau, Bobonaro, Covalima inklui Rejiaun Administrativa Espesiál Oé-Cusse Ambeno (RAEOA) no ikus funsionamentu inspesaun fiskalizasaun atividade ekonomia nian.
Jornalista : Arminda Fonseca
Editór : Cancio Ximenes
