Deputada opozisaun preokupa atividade AIFAESA, I.P paradu
DILI, 15 janeiru 2024 (TATOLI)—Deputada opozisaun FRETILIN, Lidia Norberta, preokupa Autoridade Inspesaun no Fiskalizasaun Atividade Ekonómika Sanitária no Alimentár Institutu Públiku (AIFAESA, I.P) ninia atividade diária halo fiskalizasaun no inspesaun ba instalasaun komersiál sira provizóriamente paradu.
Notísia Relevante: AIFAESA,I.P nia atividade paradu provizóriamente tanba funsionáriu 118 termina kontratu
“Governu Aprezenta orsamentu 2024 ba AIFAESA, I.P millaun $2-resin, maibé infelizmente ami la hatene osan sira-ne’e aumenta tan para mákina ne’e bele la’o ka mákina ne’e atu toba, sira na’in lima de’it mak serbisu. Ema sira seluk la serbisu para atu kontrola aihán sira-ne’ebé mak tama, ida-ne’e problema boot ida, ami presiza Governu tenke haree,” Deputada opozisaun ne’e levanta preokupasaun ne’e liuhosi reuniaun plenária PN, segunda ne’e.
Antes ne’e, Inspetór Jerál AIFAESA, I.P, Ernesto Monteiro, hateten atividade paradu dezde tama tinan foun tanba funsionáriu tékniku hamutuk 118 nia kontratu termina hotu iha tinan 2023 nia rohan, agora seidauk tama fali serbisu hodi hala’o atividade rutina tanba seidauk iha desizaun extende sira-nia kontratu.
Iha reuniaun plenária, segunda ne’e, la marka prezensa hosi parte Governu liuhosi Vise Ministru asuntu Parlamentár, Adérito Hugo da Costa, tanba ohin iha reuniaun Konsellu Ministru (KM) nune’e partisipa de’it tékniku sira hodi rejista preokupasaun Deputadu sira-nian.
Jornalista : Nelson de Sousa
Editór : Cancio Ximenes
