DILI, 15 janeiru 2024 (TATOLI) – Ministru Obras Públiku (MOP) Samuel Marçal, hateten estrada ligasaun hosi Urahou-Turiscai sei konstrui iha tinan ida-ne’e.
“Los duni katak dalan ligasaun Urahou-Turiscai ha’u la haluha, iha tempu besik ita sei hadia duni, dalan ida-ne’e tanba tama iha lista ida P44, entaun sei presiza Konsellu Ministru hasai fali dekretu lei ida hodi hahú prosesu ne’e la’o ba oin”, Ministru Samuel dehan ba jornalista sira iha Palásiu Governu, ohin.
Tuir nia, iha semana rua ou tolu mai sei aprezenta lista kona-ba estrada sira ne’e hotu ho dekretu lei ida ba Konsellu Ministru atu kontinua obra sira ne’ebé empreza sira kaer la hotu inklui Urahou-Turiscai.
Kona-ba orsamentu ba konstrusaun Estrada, ministru seidauk bele fó sai tanba sei halo diskusaun uluk iha Konsellu Ministru kona-ba dekretu lei ne’ebé ministru sei aprezenta iha semana sira mai ne’e.
“Bainhira dekretu lei aprova ona, ita foin bele loke konkursu públiku atu kompaña ne’ebé iha interese atu bele kaer, orsamentu depois mak ita haree”, nia relata.
Estrada ligasaun Urahou-Turiscai kuaze kilometru 20-resin ne’ebé agora iha situasaun grave no fó ameasa ba movimentasaun transporte públiku no privadu.
Notísia relevante : Lian hosi Xefe Suku 11 iha Turiscai ba Governasaun Xanana
Jornalista: Hortencio Sanchez
Editór : Zezito Silva
