KFP hahú buka hatene problema profesór kontratadu sira iha Oé-Cusse
OÉ-CUSSE, 15 janeiru 2024 (TATOLI) – Prezidente Komisaun Funsaun Públika (KFP), Agostinho Letêncio de Deus, akompaña hosi Diretora Nasionál Umanu hosi Ministériu Edukasaun no Komisáriu Asuntu Fosa Traballu, segunda ne’e hala’o diálogu aberta ho profesór kontratadu sira iha Rejiaun Administrataiva Espesiál Oé-Cusse Ambeno (RAEOA).
“Objetivu prinsipál hosi sorumutu ohin, maka atu halo diskusaun no diálogu atu-bele hatene problema, diálogu ohin atu la’ós atu rezolve no la’os atu deside maibé diálogu ohin atu hatene problema iha-ne’ebé,” Prezidente KFP, ko’alia iha enkontru ne’ebé hala’o iha Otel Ambeno Oé-Cusse.
Tuir nia, Komisaun Funsaun Públika hakarak loke diálogu ida-ne’e, importante tanba ekipa ne’ebé dezloka hosi nasionál, hamutuk ho hanesan Sekretária Sesante ba Asuntu Edukasaun, Komisáriu Asuntu Fosa Traballu, Diretóra Rekursu Umanu Ministériu Edukasaun nian.
“Ami mai atubele rona didi’ak problema ne’ebé maka akontese ba profesór sira iha Oé-Cusse, tanba foin lalais, reprezentante profesór balu ba dere odamatan Funsaun Públika nian, husu dadus, husu atu chek naran, tanba loron-loron husu hela deit, entaun ami hili mai Oé-Cusse, atu rona direita ita-boot sira,” nia katak.
Notisia relevante: Profesór kontratadu 259 hosi Oé-Cusse elejivel ba ingresu espesiál
Prezidende Komisaun Funsaun Públika ne’e hateten, maneira atu rezolve la’ós liuhosi demostrasaun, ba profesór sira iha maneira rasik atu bele rezolve, sei ita-bele rezolve asuntu estudante sira-nian ne’ebé mai hosi klase ki’ik, lahatene hakerek, entaun ita-boot sira rezolve to’o hakerek.
“Ha’u hanoin problema profesór ita bele rezolve maibé rezolve ho dalan prosedimentu administrativu nian, entaun ohin ne’e ba RAEOA ami hakarak rona profesór sira-nia tanba iha Governu hirak kotuk, kuaze laiha komunikasaun entre RAEOA ho Governu Sentrál liga ho profesór nian,” nia katak.
Tan ne’e maka, liga ho dadus sálariu no kontratu dalaruma iha nasionál laiha koñesimentu, depois Komisaun Funsaun Públika, bele rejista de’it funsionáriu hotu-hotu inklui profesór sira, bainhira iha klareza entre RAEOA ho nasionál liuhosi Funsaun Públika.
“Sei foin daudaun imi ba husu iha Funsaun Públika, ami-nia resposta ba imi mak ne’e, ami lahatene, tanba ita laiha komunikasaun entre RAEOA ho Ministériu Edukasaun durante ne’e,” nia tenik.
Tan ne’e maka ho orientasaun hosi Primeiru Ministru atu urjentimente mai RAEOA atu rezolve kada asuntu, tantu profesór no kontratadu sira seluk, tenke tur hamutuk atu rezolve, ne’ebé nasaun ida-ne’e la presiza buat hotu hakilar malu atu rezolve.
Sekretária Rejionál sesante ba Asuntu Edukasaun no Solidariedade, Avelina da Costa, agradese ba ekipa konjunta hosi nasionál, tanba bele rona direita preokupasaun profesór sira-nia problema durante ne’e enfrenta.
“Agradese ba ekipa tomak hosi nasionál, tanba bele mai to’o Oé-Cusse hasoru profesór kontratadu sira, tanba durante ne’e dedika ona sira-nia funsaun hanesan manorin iha eskola 108 iha Oé-Cusse hosi pré-eskolár to’o sekundáriu, ne’ebé oportunidade di’ak mai ita hotu atu hato’o saida mak akontese ba solusaun nian,” no orgullu.
Notísia relevante: Profesór kontratadu husu ME kansela tomada pose ba profesór 24 iha Oé-Cusse
Jornalista: Abílio Elo Nini
Editór: Evaristo Soares Martins
