OÉ-CUSSE, 15 janeiru 2024 (TATOLI) – Diretora Nasionál Rekursu Umanu hosi Ministériu Edukasaun, Anita Tavares de Jesus, informa, ñrofesór kontratadu hamutuk na’in-259 hosi Rejiaun Administrativa Espesiál Oé-Cusse Ambeno (RAEOA), tama iha rejime espesiál ligadu ho ingresu espesiál nian bazea dekretu-lei númeru 31/2023, loron 31 maiu kona-bá Rejime Karreira Dosente.
“Iha faze dahuluk, na’in-24 sira-ne’e, dalaruma naran iha sistema ona, entaun ami prosesa tán ba faze daruak nian 235, agora hamutuk 259, foin daudaun ne’e sai tiha ona iha desizaun submisaun atu haruka ba iha Jornál Repúblika,” Anita Tavares de Jesus, informa, bainhira hala’o diálogu ho profesór sira iha Otél Ambeno Oé-Cusse, segunda ne’e.
Notísia relevante: Profesór kontratadu husu ME kansela tomada pose ba profesór 24 iha Oé-Cusse
Nia hateten, jeralmente iha faze dahuluk profesór iha territóriu nasionál na’in-4089 sira-nian prosesa no sai ona no públika, agora iha faze daruak ne’e hamutuk 600 inklui RAEOA nian hamutuk 235.
“Ida-ne’e maka ohin ami mai, sei taka iha Oé-Cusse, atubele haree naran, ne’e komisaun avaliasaun hasai ona despaxu, karik iha naran balu la sai, ne’e tanba diploma seidauk legaliza, entaun ha’u labele halo buat ida kuandu komisaun avalia dokumentu balu la kompletu,” nia fó hanoin.
Nia esplika, prosesu lista atu asesu ba ingresu espesiál, la’os Ministériu Edukasaun halo mesak maibé ekipa konjunta, ne’ebé bazea ba akordu ida entre Komisaun Funsaun Públika ho Ministériu Edukasaun, tan ne’e, maka ministériu servisu hamutuk ho Komisaun Funsaun Públika ninia dadus tenke rejistadu iha sistema.
Notísia relevante:Profesór na’in-121 iha Oé-Cusse sei kompleta formasaun akadémika
Jornalista: Abílio Elo Nini
Editór: Evaristo Soares Martins
