BOBONARO, 15 janeiru 2024 (TATOLI)-Komunidade sira husu Governu liuhosi Ministériu Obra Públika, atu tau-matan ba estrada ligasaun hosi kapitál Maliana ba postu administrativu Bobonaro inklui postu administrativu Lolotoe, ne’ebé dadaun ne’e kondisaun grave hodi difikulta movimentasaun transporte públiku no privada.
Komunidade suku Bobonaro, Verónica de Jesús Timan, informa, kondisaun estrada ne’e aat kuaze tinan barak ona, tanba obra refere konstrui dezde tempu okupasaun Indonézia mai to’o agora governu seidauk tau prioridade atu rezolve.
Notisia relevante: Autoridade munisipál koordena MOP prioritiza estrada Maliana-Bobonaro no Lolotoe
Nia dehan, kada tinan kuandu udan-boot halo estrada aat hotu, tanba aspal sira uluk halo dezde tempu Indonézia nian.
“agora nakloke, fera hotu to’o halo rai halai, ita liu ba mai mos susar la halimar. Ohin ami tún mai, karreta barak mak mout iha Oeleu nian ne’e, sa’e labele, ami husu governu atu tau-matan netik ba,” nia informa bá Tatoli, iha área Hali-Mesak, segunda ne’e.
Tuir nia, kondisaun estrada refere grave liu iha parte Lahomea, Galusapulu, Halimesak, Odomau to’o Ilibole.
“Dalan sira ne’e agora tempu udan, bee mak nakonu iha laran, depois tahu kois, ita viajen ho motor namdoras, sorte aat ita bele monu ba rai-naruk, piór liután ba sira-ne’ebé uza kareta, ne’e sa’e iha Oeleu nian ne’e labele, tenke patina,” nia hateten.
Motorista Kamioneta, Filipe de Oliveira Barros, haktuir, estrada refere tinan-tinan governu liuhosi Institutu Jestaun Ekipamentu Apoia Dezembolvimentu Infraestrutura, Institutu Públiku (IGEADI,IP sigla portugués) sempre halo reabilitasaun, maibé tempu udan siempre hetan estragu.
“Ninia rezultadu mak kria fali kolam oan iha estrada laran barak loos ne’e, tanba sira mai ateru rai, sama bosok liu ona, entaun la metin, udan mai ke’e fila fali hodi estraga tiha dalan, tanba saluran laiha, entaun bee sulin tama fali halo ita la’o ladi’ak, tahu dodok,” nia dehan.
Nia husu ba Ministériu Obra Públika atu aselera projetu konstrusaun ba estrada ne’e hodi fasilita movimentasaun públiku.
“Se ita nia governu kontinua la tau-matan, tinan tinan mak núne’e hela de’it, ema viajen ho transporte mós araska, depois difikulta ita-nia inan-aman sira atu lori produtu ba fa’an iha Maliana no negosiante sira susar atu ba sosa nesesidade bázika iha Maliana,” nia akresenta.
Tuir observasaun Jornalista Agência Tatoli iha terrenu notak katak, alende estrada ne’ebé hetan estragu, ponte ki’ik hahú hosi Galusapulu, Odomau no Ilibobele Oeleu nia mos barak mak kotu no estragu hotu ona.
Entretantu estrada refere liga ba postu administrativu Bobonaro ho totál aldeia 63, suku 18 ho nia populasaun 23,376.
Enkuantu nível postu administrativu ho totál aldeia 20, suku hitu, populasaun 7,693, entrada ne’e mos liga ba munisípiu Ermera no Covalima.
Notisia relevante: MOP konklui verifikasaun estrada Maliana ba Bobonario no Lolotoe
Jornalista: Sérgio da Cruz
Editór: Evaristo Soares Martins
