DILI, 15 janeiru 2024 (TATOLI)—Governu liuhosi reuniaun Konsellu Ministru (KM) estraordináriu, segunda ne’e, aprova ona projetu dekretu Governu, ne’ebé aprezenta hosi Ministra Finansa, Santina José Rodrigues Viegas Cardoso, kona-ba ezekusaun Orsamentu Jerál Estadu (OJE) ba tinan 2024, ne’ebé aprova hosi lei númeru 21/2023, loron 27 dezembru.
“Projetu dekretu-lei ida-ne’e ho objetivu atu estabelese regra ezekusaun Orsamentu Jerál Estadu ba tinan 2024. Iha tinan 2024, sei konklui desentralizasaun funsaun pagamentu, ho servisu no entidade hotu ne’ebé ho autonomia finanseira alargada ne’ebé asume hodi halo ninia pagamentu rasik, ho exesaun pagamentu remunerasaun sira, ne’ebé kontinua halo hosi Diresaun Jerál Tezouru,” refere nota ne’ebé Agência Tatoli asesu, hafoin reuniaun ezekutivu, iha Palásiu Governu.
Notísia relevante : PR Horta promulga ona OJE 2024 billiaun $ 1.95.
Mudansa ida-ne’e sei permite Diresaun Jerál Tezouru konsentra iha atribuisaun jestaun tezouraria no monitorizasaun ezekusaun orsamentál nian, ne’ebé nu’udar melloria kualitativa importante ida iha jestaun finansa públika.
Entretantu, diploma ne’e mós halo ajuste ki’ik iha prosedimentu ezekusaun orsamentál nian, tuir revizaun ba lei númeru 2/2022, loron 10 fevereiru, liuliu kona-ba alterasaun orsamentál.
Proposta lei OJE 2024 aprovadu ho totál konsolidadu millaun $1,95 ba administrasaun sentrál, Rejiaun Administrativa Espesiál Oé-cusse Ambeno (RAEOA) no Seguransa Sosiál, sein Fundu Rezerva Seguransa Sosiál.
Totál despeza ne’ebé prevee ba administrasaun sentrál no RAEOA hamutuk millaun $468,8, ba saláriu no vensimentu millaun $86,3, bens no servisu millaun $589,7, transferénsias públika millaun $34,2, kapitál menór millaun $411 ba kapitál dezenvolvimentu.
Enkuantu, orsamentu seguransa sosiál inklui fundu rezerva seguransa sosiál millaun $347,6. Ba asuntu ekonomia, millaun $788,2, protesaun sosiál millaun $467,1, edukasaun millaun $140,9, saúde millaun $ 66,2, no abitasaun no infraestrutura koletiva millaun $45,2.
Jornalista : Antónia Gusmão
Editora : Julia Chatarina
