COVALIMA, 15 janeiru 2024 (TATOLI) – Lixu daudaun akumula iha merkadu Debos, postu administrativu Suai, munisípiu Covalima, tanba empreza no pesoál ne’ebé baibain raut nia kontratu remata no seidauk estende.
“Empreza la raut lixu tanba Administrasaun Munisípiu Covalima [AMC] seidauk estende sira-nian kontratu, nune’e lixu bou aas iha merkadu Debos”, Sekretáriu AMC, Francisco Alves, hatete ba Tatoli, ohin.
Antes ne’e, autoridade Covalima halo kontratu ho empreza liuhusi konkursu públiku hodi raut lixu iha merkadu no kada karreta loron ida selu $65.
“Kona-ba lixu ne’ebé bou aas iha merkadu Debos ne’e foin lalais públiku hato’o sira-nia krítika, nune’e kompañia sira go voluntáriu raut maske seidauk asina kontratu. Empreza Sabudoi, Kacuga no Bonamsa ho voluntáriu raut lixu ne’ebé bou aas, maibé agora lixu nafatin iha”, Francisco Alves dehan.
Nia esplika razaun lixu akumula iha merkadu, tanba funsionáriu saneamentu na’in-19 ne’ebé toma konta atu raut lixu nia kontratu mós termina iha dezembru 2023. Pesoál limpeza ne’e la’ós foin kontrata iha tempu Governu Daualuk nian, maibé dezde 2011.
“Ha’u espera bele estende funsionáriu saneamentu sira-nian kontratu. Sira mós ho voluntáriu halo serbisu hodi raut lixu”, realsa.
Abitante Ermelinda Ferreira preokupa lixu akumula iha merkadu no to’o ohin loron la raut, nune’e halo merkadu Debos la saudavel ba vendedór sira atu fa’an sasán.
“Ami atu sosa modo haree lixu bou no asu dada lixu sira ne’e naklekar to’o ona estrada públika, maibé seidauk raut nune’e halo merkadu ladún saudavel”, nia lamenta.
Tuir observasaun jornalista, lixu la’ós akumulda de’it iha merkadu Debos, maibé mós iha fatin sira hanesan iha Santa Rosa, merkadu tuan Debos no foun iha parte suku Camanasa no Kampung Baru.
Notísia relevante: Lixu namkari la’ós hapara traballadór maibé sidadaun konsiénsia laek
Jornalista: Celestina Teles
Editora: Maria Auxiliadora
