DILI, 15 janeiru 2024 (TATOLI)—Ministériu Komérsiu no Indústria (MKI), segunda ne’e, simu ona relatóriu finál dezeñu detalladu enjeñaria hosi empeza konsultór Maidalo Unip Lda, kona-ba projetu merkadu munisipál Lautém, Baucau no Ermera.
“Ohin ita simu ona relatóriu dezeñu detalladu enjeñaria, kona-ba ninia implementasaun ba konstrusaun nian, ita sei aprezenta fali ba Sekretariadu Grade Projetu iha Ministériu Planeamentu Investimentu no Estratéjiku (MPIE) no Ministériu Obra Públika (MOP) hodi haree ba ninia Bill of Quantites (BoQ) no ezekuasaun orsamentu hodi haree ba kontinuasaun implementasaun nian,” Ministru Komériu no Indústria, Filipus Nino Pereira, informa iha ninia knaar fatin, Bebora, segunda ne’e.
Notísia relevante : Kompañia Maidalo finaliza ona projetu redezeñu merkadu munisipál-tolu
Governu prevee orsamentu $171.000 ba dezeñu detalladu enjeñaria, enkuantu kalkulasaun orsamentu ba konstrusaun merkadu tolu ne’e la hanesan, balun millaun $6, millaun $11 no millaun $12.
Iha fatin hanesan, Diretora empreza konsultór Maidalo Unip Lda, Yunita Nago, hateten, merkadu tolu ne’e balun muda fatin, enkuantu balun nafatin.
Hanesan iha munisípiu Lautém, ninia fatin la muda, sei harii nafatin iha merkadu uluk, enkuantu merkadu Baucau mak muda ba Kota-Baru nia leten no Ermera iha Gleno.
Jornalista : Arminda Fonseca
Editora : Julia Chatarina
