DILI, 15 janeiru 2024 (TATOLI)—Ministériu Obra Públika (MOP) planeia ona sei harii ponte foun neen inklui estrada lubuk ida iha tinan 2024 ne’e.
“Tinan ne’e, projetu ba konstrusaun ponte foun hamutuk neen ka hitu hanesan ne’e hetan ona aprovasaun iha Orsamentu Jerál Estadu (OJE) 2024 atu konstrui, inklui mós estrada lubuk ida,” Ministru Obra Públika, Samuel Marçal, informa, iha Palásiu Governu, segunda ne’e.
Estrada no ponte hirak ne’e ninia prosesu hahú dezeñu ona, nune’e bainhira balun ramata maka sei haruka ba Komisaun Nasionál Aprovizionamentu (CNA, sigla portugés) hodi halo prosesu konkursu públiku.
“Maibé ita hotu hatene prosesu aprovizionamentu ne’e han tempu oituan, ne’ebé husu ba komunidade, ba hirak ne’ebé estrada no ponte daudaun a’at atu pasiénsia oituan tanba prosesu mak la’o hanesan ne’e,” Ministru akresenta.
Notísia relevante : Komunidade postu Ossu ho inisiativa harii ponte alternativa
Ponte sira ne’ebé atu harii hanesan iha parte Natarbora Manatuto, Manufahi, Baucau no fatin seluk tan.
OJE 2024 ne’ebé aloka ba MOP hamutuk $224.279.372, kompostu hosi saláriu no vensimentu $9.187.551, bens no servisu $21.802.827, transferénsia públika $155.000.000, kapitál menór $198.400 no kapitál dezenvolvimentu $38.090.594.
Ba programa estrada no ponte $51.515.032, dezevolvimentu rurál no urbanu $2.804.340, funsionamentu no dezenvolvimentu instituisionál $13.611.520, bee no saneamentu $6.588.680, eletrisidade $149.118.800, programa laboratóriu no infraestrutura $6.410.000.
Tuir livru OJE 2024, MOP iha planu asaun anuál ne’ebé tau prioridade ba programa neen hanesan programa estrada no ponte ho ninia sub-programa infraestrutura estrada, ponte no kontrolu cheias ho atividade 12, sub-programa investe iha planeamentu, atualizasaun, manutensaun no regulamentasaun rede rodaviáriu ho atividade rua.
Programa dezenvolvimentu rurál no urbanu ho ninia sub-programa estabelese no aplika kontrola konstrusaun ho atividade tolu, sub-programa dezenvolve polítika planeamentu urbanu ho atividade tolu, sub-programa mellora abitasaun nasionál ho atividade haat.
Progama funsionamentu no dezenvolvimentu instituisionál ho sub-programa rua no nia atividade hamutuk 15, bee no saneamentu ho nia sub-progama dezenvolvimentu no manutensaun sistema abastesimentu bee iha área rurál no urbanu ho atividade mak rua, sub-programa jestaun saneamentu ho atividade rua, sub-programa regulasaun jestaun ba rekursu ídriku no abastesimentu bee iha área rurál no urbanu ho nia atividade neen.
Programa eletrisidade ho nia sub-programa apoiu destinadu peskiza no regulasaun atividade elétrika ho atividade tolu, sub-programa enérjia elétrika oras 24 ho atividade ida, programa laboratóriu infraestrutura ho sub-programa dezenvolve apoiu norma téknika no teste ba konstrusaun no enjenária sivil ho atividade haat, sub-programa kontrola kualidade konstrusaun sivil no obra públika.
Jornalista : Arminda Fonseca
Editora : Julia Chatarina
