VIQUEQUE, 15 janeiru 2024 (TATOLI)—Servisu Agrikultura munisípiu Viqueque liuhosi Diresaun Reprezentante Territoriál Floresta (RTF), konsege rekolla reseita hosi ai komersiál hamutuk $22.142,75, iha tinan 2023.
“Ami rekolla reseita sira-ne’e liuhosi ai komersiál, liu-liu ai-teka no a-Filipina ne’ebé maka negosiante sira tesi hodi halo negósiu,” Xefe Departamentu Reprezentante Territoriál Servisu Agrikultura munisípiu Viqueque, José da Silva, informa ba Agência Tatoli, iha ninia knaar fatin, Beloi, segunda ne’e.
Negosiante sira halo pedidu ko’a ai-teka 804,11 m3, ne’ebé kada metru kúbiku selu $25, totál reseita hosi ai-teka $20.102,75, ai-teka Filipina 136 m3, ne’ebé kada metru kúbiku selu $15, nune’e totál reseita $2.040.
“Prosesu ko’a ai iha tipu rua, rekerente sira tenke kompleta dokumentu hanesan rekomendasaun suku, kartaun eleitóral no karta pedidu haruka mai ami, hafoin ami haruka rekerente manda bá nasionál no halo pedidu hodi nasionál orienta tékniku sira halo verifikasaun ba ai hotu maka foin hetan karta lisensa tesi. Bainhira tesi hotu, atu tula tenke hetan mós karta lisensa hodi rekerente sira bele tesi. Bainhira abitante sira la hetan karta lisensa, Servisu Floresta sei halo apreensaun ba ai,” nia akresenta.
Notísia relevante : Guarda Florestál Viqueque halo apreensaun ai-teka 2m3 iha suku Luca
Nia dehan, abitante sira tenke kumpre regra tesi ai se lae bele aplika multa.
“Bainhira prosedimentu sira-ne’e maka la kumpre, maka ami sei halo apreensaun ai tipu rua no aplika multa. Hanesan iha tinan 2023 ami halo aprensaun ba ai-teka 4,46 m3, ne’ebé abitante selu multa $334,50,” nia tenik.
Abitante barak mak seidauk hatene kona-ba prosesu hetan karta lisensa, nune’e Servisu Floresta halo ona sosializasaun hodi abitante sira bele hatene, maski sosializasaun seidauk to’o iha baze.
“Iha tinan kotuk, ami halo ona sosializasaun ba abitante sira, maibé ami sente seidauk to’o iha baze tanba kestaun tempu limitadu tebes. Maski kestaun tempu, ami kontinua introdús ba abitande sira-ne’ebé mai vizita ami-nia fatin no ba oin ami sei esfrosu hodi halo sosializasaun ba abitante sira,” Diretór hato’o.
Jornalista : Vitorino Lopes da Costa
Editora : Julia Chatarina
