VIQUEQUE, 11 setembru 2023 (TATOLI)– Guarda Florestál munisípiu Viqueque halo apreensaun ai-teka metru kúbiku rua (2m3) hosi komunidade suku Luca, postu Viqueque Vila, munisípiu Viqueque tanba laiha dokumentu lisensa komersiál.
“Funsionáriu Guarda Florestál foin lalais iha fulan-setembru ne’e halo apreensaun ai-teka metru kúbiku rua hosi suku Luca atu lori mai munisípiu Viqueque, ne’ebé hatama iha karpinteria sira iha Viqueque, maibé sira laiha dokumentu tula. Ho nune’e Guarda Florestál sira hetan no fó hatene ba Polísia Eskuadra Viqueque hodi halo apreensaun no daudaun ai sira-ne’e rai iha edifísiu Servisu Ministériu Agrikultura no Peska,” Xefe Departementu MAP munisípiu Viqueque, Helder Daniel Amaral, informa ba Agência Tatoli, iha edifísiu Servisu MAP, Beloi, segunda ne’e.
Nia dehan, na’in ba ai ne’e tenke selu multa, kada metru kúbiku ai-teka $25 tuir tabela normál mak foin bele foti filafali.
“Ami haruka ona na’in bá Dili hodi selu multa, bainhira sira selu tiha mak foin ami fó fali ai ba sira. Karik na’in sira lakoi selu maka ai sira ne’e sei sai patrimóniu Estadu,” nia akresenta.
Notísia relevante : MAP Viqueque prende ai-teka ilegál kúbiku hitu
Produtu florestál presiza iha tipu lisensa rua hanesan lisensa sosiál no komersiál ne’ebé departamentu floresta entrega ba komunidade.
“Ha’u husu ba abitante Viqueque sira bainhira hakarak tesi ai ruma tenke halo lisensa tesi no tula. Bainhira lakoi trata dokumentu maka ami hetan, sei halo apreensaun, tanba ne’e ami prefere abitante sira sei hakarak tesi mai ami-nia fatin hodi karta lisensa. Ai-teka metru kúbiku ida iha ai 84, nune’e metru kúbiku rua iha ai 168 ne’ebé daudaun ne’e rai iha edifísiu Servisu MAP,” nia fó hanoin.
Antes ne’e, Guarda Florestál halo apreensaun hamutuk metru kúbiku neen ho totál ai 504, ne’ebé rai iha edifísiu Servisu MAP maibé to’o agora na’in seidauk selu multa ba Estadu.
“Na’in mós ami buka laiha ne’ebé aban bain-rua sei loke ba públiku karik iha ema atu sosa tanba na’in sira seidauk selu multa ba Estadu,” nia tenik.
Jornalista : Vitorino Lopes da Costa
Editora : Julia Chatarina
