DILI, 16 janeiru 2024 (TATOLI)–Aeroportu no Navegasaun Timor-Leste, Empreza Públika (ANATL, E.P) rekolla reseita hamutuk millaun $2,4 durante tinan 2023.
“Reseita ANATL maioria maihosi movimentu aviaun, ema no ema, aviaun ne’ebé tun iha aeroportu ne’e mak hatama reseita, no ema ho fasilidade ne’ebé sai hosi aeroportu. Atu dehan reseita iha tinan 2023 sa’e fali ona kompara ho tinan-tolu ba kotuk, sa’e maka’as tanba iha tinan ne’e atividade hotu normaliza ona, no movimentu aviaun mós la’o normál fali ona,” Vogál Asuntu Administrasaun, Finansa, Lojístika, Komersialidade no Rekursu Umanu ANATL, E.P, Verrisimo Nai Sia, informa ba Agência Tatoli, iha ninia knaar fatin, Aeroportu Comoro, tersa ne’e.
Bazeia ba gráfiku, desde tinan 2020 to’o 2021 reseita tun maka’as tebes tanba situasaun COVID-19 ne’ebé suspende atividade hotu iha aeroportu.
“Tinan 2021 rekolla de’it reseita rihun $600-resin. Enkuantu iha tinan 2022 hahú sa’e fali ba millaun $1,2,” nia akresenta.
Notísia relevante : Bolseiru 10 husi ANATL sei dezloka bá Indonézia hafoin hetan pasaporte
Vogál ne’e esplika, reseita ne’ebé tama maka’as mai hosi movimentu aviaun no ema, ein termu reseita sira seluk hanesan publisidade no okupasaun espasu sei menus tebes.
Aleinde ne’e, publisidade sira ne’ebé taka iha areadór Aeroportu Prezidente Nicolau Lobato, Comoro ne’e, hosi empreza Oppo mak boot liu.
“Sira kada fulan selu kuaze $3.000, sira mak selu boot liu kompara ho publisidade sira seluk,” nia tenik.
Durante ne’e públiku sempre kestiona katak aeroportu sai fali fatin empreza Oppo tanba de’it sira-nia publisidade boot tebes no kuaze domina aeroportu.
“Ami simu krítika hotu hosi públiku maibé iha parte seluk ami mós presiza rekolla reseita para sustenta ANATL, tanba antes ne’e Governu la fó subsídiu depois iha tempu COVID-19 mak foin Governu fó, maibé tanba planu ona atu halo dezenvolvimentu aeroportu maka ba oin sei kria mekanizmu hotu hodi dezenvolve aeroportu ne’e ho di’ak liután tanba nu’udar odamatan boot nasaun nian,” Jerente ne’e relata.
Jornalista : Antónia Gusmão
Editora : Julia Chatarina
