DILI, 16 janeiru 2024 (TATOLI)–Aeroportu no Navegasaun Timor-Leste, Empreza Públika (ANATL, E.P) to’o agora seidauk rekolla osan hosi vizitante asesu areadór Aeroportu Internasionál Prezidente Nicolau Lobato, Comoro, maski iha loron dezembru 2023 lansa ona automatic parking system equipment.
“Loos duni katak lansamentu ne’e hala’o iha dezembru 2023 no iha loron 01 janeiru 2024 ne’e atu hahú selu, maibé to’o agora seidauk tanba sei kria diploma ida hodi define loloos sé mak bele selu no sé mak labele selu, tanba iha funsionáriu hosi instituisaun oin-oin mak servisu iha aeroportu ne’e no sira ninia karreta no motorizada para loron tomak iha ne’e, tanba bainhira selu ona maka motorizada no karreta para iha areadór aeroportu liu oras ida tenke selu valór liu,” Vogál Asuntu Administrasaun, Finansa, Lojístika, Komersialidade no Rekursu Umau ANATL, E.P, Verrisimo Nai Sia, informa ba Agência Tatoli, iha ninia knaar fatin, Aeroportu Comoro, tersa ne’e.
Notísia relevante : Hahú janeiru 2024, asesu areadór Aeroportu Comoro tenke selu exeptu VIP
Nune’e, nia espera fulan oin bele hahú selu ona bainhira iha ona definisaun ba funsionáriu sira ne’ebé serbisu iha aeroportu.
ANATL, E. P daudaun ne’e hahú ona opera automatic parking system equipment ho faze trial ka teste.
Bazeia ba Diploma Ministeriál Konjunta númeru 38/2021, 23 jullu, artigu 20, kona-ba tarifa estasionamentu veíkulu, bainhira asesu ba aeroportu laran tuir tarifa, veíkulu hanesan bus, truck no anguna para oras ida selu $1,50, veíkulu lijeiru hanesan karreta privadu no taxi sira kada oras selu $1, enkuantu motorizada oras ida selu $0,50.
Para permanente ka liu oras 12 to’o oras 24 nia laran maka veíkulu hanesan bus, truck no anguna sei selu $40, veíkulu lijeiru hanesan karreta privadu no taxi sira sei selu $25, no motorizada $10.
Jornalista : Antónia Gusmão
Editora : Julia Chatarina
