DILI, 05 dezembru 2023 (TATOLI)—Aeroportu no Navegasaun Timor-Leste, Empreza Públika (ANATL, E.P), tersa ne’e, lansa ‘Automatic Parking System Equipment’, iha Aeroportu Internasionál Prezidente Nicolau Lobato, Comoro.
Sistema ne’e lansa hosi Ministru Transporte no Komunikasaun, Miguel Manetelu, akompaña hosi Prezidente ANATL, E.P, José Trindade da Cruz Pinto, no asiste hosi funsionáriu no parseiru dezenvolvimentu sira.
Governante ne’e konsidera inisiativa ne’e di’ak tanba ho implementasaun sistema ne’e, vizitante sira bainhira atu tama areadór aeroportu tenke selu, nune’e bele rekolla reseita ba Estadu no bele kontrola di’ak liután asesu transporte públiku ne’ebé tama bá Aeroportu Comoro.
“Presu sira ne’ebé oferese, bainhira bazeia duni ba diploma ministeriál, ha’u hanoin laiha problema maibé timor-oan toman la’o ain, ha’u tauk ita tau tiha sistema ne’e karreta para tiha iha li’ur mak sira la’o ain tama de’it bá aeroportu, maibé lalika hakfodak tanba ministériu sei serbisu hamutuk ho Polísia Tránzitu hodi bele tau-matan ba karreta sira ne’ebé para iha estrada hodi sira bele tama mai iha aeroportu hodi ita bele hetan reseita di’ak,” Ministru Miguel hateten, iha ámbitu lansamentu, iha Aeroportu Comoro.
Notísia relevante : Governu sei revee kontratu dezenvolvimentu Aeroportu Comoro
Kustu ba instalasaun área parajen transporte sira hamutuk rihun $90.
“Ami garante katak bainhira implementa, lori fulan-ualu de’it osan ne’e bele rekolla hikas bainhira kada loron rekolla taxa $400. Ida-ne’e di’ak tebes no di’ak liu maka bele hakma’an ona orsamentu ministériu nian tanba kauza hosi COVID-19, ministériu kada tinan tenke prevee millaun $1-resin atu sustenta despeza ANATL, ne’ebé espera katak ho reseita sira ne’ebé hetan hosi investimentu ne’e bele rekupera, ida-ne’e ha’u kontente tebes,” nia akresenta.
Nia dehan, investimentu ne’e di’ak hodi mellora di’ak liután fasilidade aeroportu, nune’e ANATL tenke halo serbisu maka’as, la’ós atu administra de’it aeroportu ne’ebé Estadu entrega hela, maibé liu-liu atu lori reseita ba kofre Estadu.
“Se ita la konsege rekolla reseita, investimentu ne’ebé Estadu halo dala ruma susar no kontribui ba buat ne’ebé ladún di’ak,” nia tenik.
Iha fatin hanesan, Prezidente ANATL, E.P, José Trindade da Cruz Pinto, hateten, instituisaun ne’e nu’udar operadór ba Aeroportu Internasionál Prezidente Nicolau Lobato, ne’ebé iha responsabilidade boot hodi fornese servisu di’ak ba kliente, parseiru no konsumidór sira hotu ne’ebé uza fasilidade iha aeroportu.
Hodi garante estabilidade no konfortabilidade iha ANATL, E. P nia atendimentu, maka presiza mantein atendimentu ho kualidade no hasa’e reseita própria.
Automatic Parking System Equipment ezekuta hosi empreza lokál, VILAGEM ho orsamentu hamutuk rihun $41.
“Bazeia ba Diploma Ministeriál Konjunta númeru 38/2021, 23 jullu, artigu 20, sobre tarifa estasionamentu veíkulu no ho kompromisu boot hodi bele implementa reseita refere, ANATL, E. P halo esforsu hodi inisia ho prepara infraestrutura di’ak no avansadu hodi bele fornese fasilidade ne’ebé di’ak ba parseiru, kliente no konsumidór sira hotu ne’ebé tama ba areadór aeroportu,” Prezidente ANATL, salienta.
Nia haktuir, empreza estatál ne’e inisia konstrusaun ho fazeadamente, ne’ebé hahú kedas iha tinan 2022 liubá.
Iha fasilidade estasionamentu ezistente, fornese fatin estasinamentu ba veíkulu, hanesan bus no truck hamutuk haat, kareta 101, no motorizada 105.
Iha faze dahuluk, ANATL, E. P kompleta ona konstrusaun fasilidade estasionamentu foun ba veíkulu hanesan bus no truck haat, karreta 104 no ba motorizada 103.
Iha faze daruak, kontinua ho konstrusaun fasilidade estasionamentu ba automatic parking system equipment and traffic sign, ne’ebé foin kompleta iha outubru 2023.
Tuir mai, ANATL planu sei konklui fasilidade estasionamentu iha faze datoluk ba konstrusaun fasilidade apoia maka hanesan instalasaun rede (fencing) no konstrusaun kakuluk ba postu estasionamentu hodi fó seguransa másima no komfortabilidade ba konsumidór hotu.
Hahú faze teste iha loron 06 to’o 31 dezembru
Enkuantu, iha faze implementasaun, ANATL, E. P sei hahú opera automatic parking system equipment ho implementasaun trial ka teste ne’ebé sei opera hahú iha loron 06 to’o 31 dezembru 2023.
“Objetivu hosi implementasaun triál ida-ne’e hodi públiku sira hotu bele apár ho sistema operasaun automátiku hanesan dalan atu tama no sai ba karreta no motorizada, foti no entrega billete, halo pagamentu bazeia ba tipu veíkulu,” Prezidente empreza públika esplika.
Nune’e, durante períodu teste, ANATL, E. P. sei halo observasaun hodi bele identifika difikuldade, obstákulu no preokupasaun hirak ne’ebe mai hosi parte hotu hodi bele hadi’a tuir nesesidade ne’ebé presiza, hodi garantia atendimentu di’ak liu.
“ANATL, E. P deside kliente hahú selu iha loron 01 janeiru 2024, ho métodu oin rua hanesan pay cash ou uza parking card (kartaun estasionamentu) ne’ebé iha nia durasaun tempu,” nia akresenta.
Bazeia ba Diploma Ministeriál Konjunta númeru 38/2021, 23 jullu, artigu 20, kona-ba tarifa estasionamentu veíkulu, bainhira asesu ba Aeroportu laran tuir tarifa, veíkulu hanesan bus, truck no anguna para oras ida selu $1,50, veíkulu lijeiru hanesan karreta privadu no taxi sira kada oras selu $1, enkuantu motorizada oras ida selu $0,50.
Para permanente ka liu oras 12 to’o oras 24 nia laran maka veíkulu hanesan bus, truck no anguna sei selu $40, veíkulu lijeiru hanesan karreta privadu no taxi sira sei selu $25, no motorizada $10.
“Sé de’it mak livre hosi taxa ne’e mak funsionáriu ANATL, karreta sira ho xapa matríkula kor azul (membru Governu) no mean (membru Parlamentu) sira asesu livre no gratuita. Ne’e la’ós diskriminasaun maibé VIP ne’e la’o urjente, entaun kestaun seguransa labele demora,” nia klarifika.
Iha biban ne’e, ANATL husu parte hotu nia atensaun no kolaborasaun iha ámbitu utiliza fasilidade foun Aeroportu Comoro hodi bele garante estabilidade no konfortável.
Jornalista : Antónia Gusmão
Editora : Julia Chatarina
