AMTL-Asosiasaun Médika Malázia asina akordu atu haforsa formasaun ba médiku sira
DILI, 19 Setembru 2026 (TATOLI) – Asosiasaun Médika Timor-Leste (AMTL) no Asosiasaun Médiku Malázia asina akordu kooperasaun hodi haforsa programa formasaun ba membru sira, liuliu iha área saúde klínika, saúde públika no peskiza.
“Akordu ne’e sei loke oportunidade ba médiku sira husi Timor-Letse no Malázia atu halo interkámbiu sientífiku, fahe koñesimentu no serbisu hamutuk iha dezenvolvimentu programa peskiza iha área saúde”, Prezidente AMTL, Herculano Seixas, dehan ba jornalista sira, iha Lahane, ohin.
Nia esplika katak asinatura akordu kooperasaun ho Malázia ne’e atu haree oinsá AMTL bele aproveita kolaborasaun ho Asosiasaun Médika Malázia atu reforsa programa formasaun no kapasitasaun kontinuada ba membru sira, tantu iha área klínika, saúde públika komu peskiza.
“Iha nasaun sira iha rejiaun, kuaze hotu iha ona orden ka órgaun médiku ne’ebé iha papél atu regula prátika profisionál médiku sira. Tanba ne’e, kompeténsia orden médiku sira-nian inklui prosesu rejistu profisionál, lisensa prátika, medida disiplinár, definisaun padraun prátika klínika, kodigu étika profisionál, no advokasia ba formasaun no kapasitasaun kontinuada ba médiku sira iha Timor-Leste ne’e importante tebe’,’ nia afirma.
Hodi esplika katak inisiativa ida-ne’e sei kontribui ba kuidadu saúde ho kualidade di’ak. Ida-ne’e importante tebes atu defende profisaun médika hodi hala’o sira-nia ezersísiu tuir padraun ne’ebé iha, no mós defende kualidade asisténsia médika ba sidadaun sira.
Iha fatin hanesan, Vise-Ministru Operasionalizasaun Ospitál, Flávio Brandão, kongratula AMTL ba inisiativa hodi asina akordu ho Asosiasaun Médika Malázia, ne’ebé sei fó apoiu ba dezenvolvimentu área saúde klínika, saúde públika no peskiza.
“AMTL iha papél importante hanesan ajente ba mudansa no transformasaun iha setór saúde, liuliu haforsa profisionalizmu médiku sira. Nune’e konsidera katak médiku ne’ebé iha koñesimentu, kapasidade no profisionalizmu sei hala’o knaar no ajuda povu atu hetan atendimentu saúde ho kualidade’,’ nia dehan.
Nia konta katak médiku barak ba tuir formasaun iha nasaun oioin, mai ho kultura no karáter diferente, tanba ne’e akordu oinsá atu kapasita liután médiku sira iha Timor-Leste.
Tanba ne’e nia kongratula ba inisiativa sira-nia rasik hodi halo parseiru ho médiku sira husi nasaun seluk atu hadi’a liután setór saúde iha Timor-Leste.
Nia relata katak Timor-Leste presiza iha plataforma no padraun komún iha prátika médika, atu asegura katak aposta iha sistema saúde la’ós de’it kona-ba hetan asisténsia saúde, maibé mós asegura kualidade asisténsia ne’ebé aas ba sidadaun sira iha Timor-Leste.
Jornalista: Felicidade Ximenes
Editora: Maria Auxiliadora
