ONU hala’o votasaun preliminár datoluk ba kandidatu sira ba Sekretáriu-Jerál
DILI, 19 Setembru (TATOLI) – Konsellu Seguransa ONU hala’o ona votasaun preliminár datoluk iha loron-sesta ne’e kona-ba kandidatu ba kargu Sekretáriu-Jerál ONU tuir mai.
Kandidatu sira sei hetan informasaun hosi rezultadu sira liuhosi reprezentante permanente sira hosi Estadu-membru sira ne’ebé nomeia sira, hatete hosi Jerome Bonnafont, embaixadór hosi ONU hosi Fransa, ba jornalista sira hafoin konklui votasaun sekretu. Fransa kaer prezidénsia rotativa Konsellu Seguransa nian ba fulan-Setembru.
Konsellu Seguransa nia votu preliminár sira kona-ba kandidatu sira ba Sekretáriu-Jerál maka konsulta informál sira, ho odamatan taka ne’ebé uza hodi sukat kandidatu sira-nia viabilidade; rezultadu sira la fó-sai ofisialmente. Liuhusi votasaun sira-ne’e, Konsellu
Seguransa hili kandidatu ida atu rekomenda ba Asembleia Jerál hodi hetan nomeasaun nu’udar Sekretáriu-Jerál ONU tuirmai.
Maibé, rezultadu sira hosi votasaun preliminár iha loron-sesta ne’e fó-sai ona.
Rebeca Grynspan, eis-vise-prezidente Kosta RiKa nian no atuál Sekretária-Jerál hosi Konferénsia Nasaun Unida nian kona-ba Komérsiu no Dezenvolvimentu (UNCTAD, sigla inglés), lidera votasaun iha loron-sesta ne’e ho votu neen a-favor, tuir “1 for 8 Billion”, kampaña globál ida ne’ebé defende prosesu ida ne’ebé justu, nakloke no inkluzivu hodi nomeia feto dahuluk nu’udar Sekretária-Jerál ONU nian. Carolyn Rodrigues-Birkett, reprezentante permanente Guyana nian iha Nasaun Unida, tuir ho votu ualu.
Grynspan hetan votu negativu lima, no Rodrigues-Birkett hetan neen, tuir “1 for 8 Billion.”
Membru sira Konsellu Seguransa nian tuir informasaun simu boletín votu ida ba kandidatu ida, ne’ebé lista kandidatu nia naran tuir fali ho opsaun tolu: “enkorajadu”, “dezanimadu”, no “laiha opiniaun ne’ebé espresa”, haktuir hosi “What’s in Blue”, publikasaun ida ne’ebé fornese análize hosi prosesu sira Konsellu Seguransa nian.
Iha votasaun preliminár dahuluk, ne’ebé hala’o iha loron 30 fulan-Jullu, Grynspan hetan votu a-favor 10, tuir hosi Rodrigues-Birkett ho votu neen. Maibé, iha segunda volta iha loron 21 Agostu, pozisaun sira inverte: Rodrigues-Birkett lidera ho votu ualu a-favor, tuir fali Grynspan ho votu hitu.
Iha votasaun preliminár datoluk, númeru votu kontra aumenta ba kandidatu rua ne’e.
Kandidatu na’in-neen ne’ebé sei iha maka: Ivonne A-Baki, eis-ministra no diplomata ekuadór; Michelle Bachelet, eis-Prezidente Xile nian no eis-Alta Komisária ONU nian ba Direitu Umanu; Maria Fernanda Espinosa, eis-Prezidente Asembleia Jerál ONU nian no eis-Ministra Negósiu Estranjeiru no Defeza Ekuadór nian; Rafael Grossi (Arjentina), atuál Diretór Jerál Ajénsia Internasionál Enerjia Atómika nian; Olara Otunnu (Uganda), eis-Sub-Sekretáriu-Jerál ONU nian; no Macky Sall, eis-Prezidente Senegál nian.
Mandatu hosi atuál sekretáriu-jerál ONU nian, António Guterres, hotu iha tinan ne’e nia rohan. Sekretáriu-Jerál tuirmai sei simu pose iha loron 1 fulan-Janeiru tinan 2027.
Notísia relevante: Konsellu Seguransa ONU hala’o votasaun daruak ba kandidatu sira ba Sekretáriu-Jerál
Fonte: Xinhua
