Konsellu Seguransa ONU hala’o votasaun daruak ba kandidatu sira ba Sekretáriu-Jerál

DILI, 22 Agostu (TATOLI) – Konsellu Seguransa iha loron-sesta ne’e hala’o votasaun daruak kona-ba kandidatu sira ba sekretáriu-jerál Organizasaun Nasaun Unida (ONU) nian tuirmai.

“Hala’o ona sondajen daruak votasaun informál nian,” hatete hosi Christina Markus Lassen, embaixadora ONU nian hosi Dinamarka, ne’ebé nia nasaun kaer prezidénsia rotativa hosi Konsellu Seguransa nian ba fulan Agostu.

Hafoin konkluzaun hosi votasaun segredu, Lassen hatete ba jornalista sira katak kandidatu sira sei hetan informasaun hosi rezultadu sira liuhosi reprezentante permanente sira hosi Estadu-membru sira ne’ebé nomeia sira. Prezidente Asembleia Jerál ONU nian mós sei hetan informasaun katak sondajen nian konklui ona, nia hatete.

Liuhusi sondajen sira, Konsellu Seguransa hili kandidatu ida atu rekomenda ba Asembleia Jerál hodi hetan nomeasaun nu’udar sekretáriu-jerál ONU nian tuirmai.

Sondajen sira hosi Konsellu Seguransa nian kona-ba kandidatu sira sekretáriu-jerál nian mak buletín votu informál sira ne’ebé taka ho odamatan ne’ebé uza hodi sukat apoiu ba kandidatu sira. Sira-nia rezultadu seidauk fó-sai ofisialmente.

Artigu 97 hosi Karta ONU nian hateten katak sekretáriu-jerál sei hetan nomeasaun hosi Asembleia Jerál tuir rekomendasaun hosi Konsellu Seguransa.

Lassen la fó-sai detallu ruma kona-ba votasaun iha loron-sesta ne’e. Maibé, fiar katak kandidatu na’in-ualu hotu iha buletín votu.

Kandidatu na’in-ualu ne’ebé oras ne’e hala’o iha korrida ne’e mak:

1. Ivonne A-Baki, Eis-Ministra no diplomata ekuatorianu;
2. Michelle Bachelet, Eis-Prezidente Xile nian no eis-altu komisária ONU nian ba direitus umanus;
3. Maria Fernanda Espinosa, Eis-Prezidente Asembleia Jerál ONU nian no Eis-Ministra Negósiu Estranjeiru no Ministra Defeza Ekuadór nian;
4. Rafael Grossi hosi Arjentina, atuál Diretór Jerál hosi Ajénsia Internasionál Enerjia Atómika nian;
5. Rebeca Grynspan, Eis-Vise-Prezidente Kosta Rika nian no atuál Sekretária-Jerál Konferénsia ONU nian kona-ba Komérsiu no Dezenvolvimentu;
6. Olara Otunnu hosi Uganda, Eis-Sub-Sekretáriu-jerál ONU nian;
7. Carolyn Rodrigues Birkett, Reprezentante Permanente Guyana nian iha Nasaun Unidas;
8. Macky Sall, Eis-Prezidente Senegál nian.

Membru sira Konsellu Seguransa nian fiar katak simu ona buletín votu ida ba kandidatu ida-idak, ne’ebé kontein kandidatu nia naran tuir fali ho opsaun tolu: “enkorajadu”, “la enkoraja”, no “la espresa opiniaun”, tuir What’s in Blue, ne’ebé fornese hanoin sira kona-ba asaun sira Konsellu Seguransa nian ne’ebé evolui.

Mandatu hosi atuál sekretáriu-jerál ONU nian, António Guterres, sei hotu iha loron 31 fulan-Dezembru 2026.

Notísia relevante: ONU hala’o diálogu ho kandidatu sira ba sekretáriu-jerál tuirmai

Fonte: Xinhua