MOP halo lansamentu ba projetu reabilitasaun estrada diresaun Bobonaru-Lolotoe
BOBONARU, 19 Setembru 2026 (TATOLI) – Ministru Obra Públika (MOP), Samuel Marçal, hamutuk ho entidade oioin halo lansamentu ba projetu reabilitasaun estrada diresaun husi Bobonaru bá Lolotoe kuaze kilómetru 8,9.
Ministru hatete aleinde lansamentu ba estrada, inaugura mós projetu bee-moos, no mós haree no sente kondisaun reál iha fatin ne’e.
“Nune’e hotu-hotu bele iha hanoin ida-de’it ba dezenvolvimentu rai ida-ne’e. Entaun, informasaun saida mak ami rekolla iha terrenu, hafoin lori bá hato’o fali ba Xefe Governu”, Ministru Obra Públika relata ba jornalista sira iha Postu Administrativu Lolotoe, ohin.
Nune’e Governu prepara fali orsamentu hodi hadi’a infraestrutura sira ne’ebé aat ona durante tinan barak nia laran, atu fasilita komunidade sira-nia movimentasaun ba edukasaun, merkadu no sentru saúde.
“Hafoin ita halo lansamentu sei fó tempu fulan tolu ba kompañia hodi mobiliza sira-nia ekipamentu no estabelese sira-nia kampaun ba ekipamentus nian. Tanba ne’e, husu komunidade koopera no labele halo impedimentu”, governante ne’e husu.
Nia hatutan katak bee-moos iha postu Lolotoe ne’e komunidade asesu ona, signifika sira la halerik ona ba falta bee-moos, maibé tenke uza kanalizasaun públika ho responsabilidade ka labele danifika instalasaun públika.
Projetu lansamentu estrada diresaun Bobonaru bá Lolotoe ne’e sei implementa husi kompañia internasionál (Xina) Jiangsu Ruiwo Construction, ho durasaun tempu tinan ida ho balun no ho orsamentu hamutuk $11.979.891,30.
Administradór Postu Administrativu Lolotoe, Quintino Santos de Jesus, agradese ba Governu ne’ebé konsege lansa ona estrada iha postu Bobonaru bá Lolotoe, maibé sira nafatin husu ba Governu atu tau prioridade ba estrada iha Mapelai, Molop Tobur.
“Ami mós hakarak husu ajuda ba MOP atu estabeles liña eletrifikasaun iha aldeia Oelaka subaldeia Oburo, ne’ebé durante ne’e komunidade sira la asesu to’o ohin loron. Tanba ne’e, ami sei entrega proposta ba MOP hodi haree”, administradór ne’e rekomenda.
Nia mós kompromete katak sira sei koopera ho Governu atu fó kontribuisaun ba prosesu dezenvolvimentu iha sira-nia rai ka sei la halo impedimentu ba onra referida.
Komunidade sira haksolok hodi simu dezenvolvimentu iha sira-nia rai
Reprezentante komunidade iha Lolotoe, Veneranda Santos, sente haksolok tebes ho prosesu dezenvolvimentu infraestrutura hanesan bee-moos no estrada iha sira-nia rai.
“Signifika Governu rona duni ami-nia halerik sira hodi esforsu rezolve problema ne’ebé ami hasoru durante tinan naruk nia laran”, abitante ne’e realsa.
Nune’e nia dehan ho kondisaun estrada ne’ebé iha bele fasilita sira-nia atividade bá merkadu, edukasaun no saúde ho di’ak.
Relasiona ho inaugurasaun bee-moos iha postu administrativu Lolotoe ne’e fahe ba pakote rua.
Tuir Prezidente Bee Timor-Leste, Gustavo da Cruz, hatete pakote dahuluk mak konstrusaun sistema fornesimentu bee-moos ne’ebé implementa husi kompañia Tansos Unipessoal Lda ho kustu $172.649,82. Pakote daruak mak fornesimentu no instalasaun Liner Tank ne’ebé implementa husi kompañia Aries Unipessoa, Lda., ho montante kontratu $128.303,47, nune’e totál orsamentu ba pakote rua ne’e hamutuk $300.953,29.
“Enkuantu kona-ba rekursu bee mai husi bee-matan rua ho totál débitu 2.05 L/s, elevasaun iha metru 917, iha área suku Opa ho kapasidade 1.25 L/s, ninia elevasaun 862m iha área aldeia Raimea ho kapasidade 0.8 L/s”, dirijente BTL relata.
Nia hatuta sistema fornesimentu bee-moos ne’e kobre iha área postu administrativu Lolotoe Vila, neʼebé partense ba suku Opa no aldeia Raimean. Projetu ne’e ninia instalasaun kanu tranzmisaun hamutuk kilómetru 4,8 no kanu distribuisaun hamutuk kilómetru 1,3, totál distánsia kanu tranzmisaun no distribuisaun hamutuk kilómetru 6,1.
Notísia relevante: Governu inaugura projetu eletrifikasaun komunitária no bee-moos iha Atsabe
Jornalista: Alexandra da Costa
Editora: Maria Auxiliadora
