Kuba sofre apagamentu nasionál ba dala hitu iha tinan ne’e
DILI, 19 Setembru 2026 (TATOLI) – Kuba sofre tan interupsaun eletrisidade ne’ebé jeneralizadu ohin – ba dala hitu dezde inísiu tinan – iha tempu ne’ebé falta kombustível maka’as iha illa no presaun hosi Washington.
“Iha avaria totál hosi sistema elétriku”, fó-sai hosi Ministériu Enerjia no Minas iha rede sosiál X, lahó espesifika kauza.
Ida-ne’e maka blackout nasionál ba dala hitu dezde inísiu tinan ne’e no ba dala sanulu-resin-rua dezde finál 2024.
Illa, ho populasaun millaun 9,4, sofre hosi interupsaun enerjia konstante tanba estadu envellesimentu hosi nia sentrál terminál sira – interupsaun sira ne’ebé sai aat liután dezde Janeiru, bainhira Estadu Unida Amérika impoin blokeiu petróleu nian iha illa, hodi komplika fornesimentu kombustível ba nia sentrál elétriku sira no jeradór sira rezerva nian.
Iha semana hirak ikus ne’e, interupsaun sira dura liu oras 30 iha kapitál, enkuantu iha provínsia sira seluk liu ona oras 60 tuituir malu. Fallansu sira ne’e mos afeta ba fornesimentu bee no rede telefone iha nasaun laran tomak.
Havana atribui estadu hosi nia rede elétrika ba medida punitivu sira hosi Washington, enkuantu Estadu Unida Amérika mantein katak responsabilidade iha Governu kubanu no nia jestaun ekonómiku ne’ebé ladi’ak.
Relasaun sira entre Estadu Unida Amérika no Kuba sai tensu tebes dezde inísiu tinan ne’e, liuliu hafoin Washington kaptura Prezidente Venezuela Nicolás Maduro, aliadu ida hosi Governu kubanu – liuliu tanba nia nasaun maka fornesedór prinsipál petróleu Kuba nian.
Notísia relevante: Fallansu rede elétrika husik Kuba iha nakukun
Fonte: Xinhua/Notícias ao Menuto
