Fallansu rede elétrika husik Kuba iha nakukun
DILI, 03 Agostu 2026 (TATOLI) – Rede elétrika nasionál Kuba nian monu husik povu iha nakukun laran tanba kauza husi transformadór sira hetan estragu no kapasidade jeradór la sufisiente.
Electric Union estatál, ne’ebé koñesidu ho naran UNE, fó-sai kolapsu iha X iha loron-domingu kalan maibé la identifika kedas ninia kauza, extensaun hosi interrupsaun ka bainhira maka sei restaura eletrisidade.
Molok fallansu nasionál, empreza eletrisidade Havana nian relata ona interrupsaun sira ne’ebé kauza hosi transformadór sira ne’ebé hetan estragu, fallansu sirkuitu nian, no korta planeadu sira ne’ebé liga ba kapasidade jeradór ne’ebé la sufisiente.
Iha Domingu madrugada, rejista ona keixa sanulu-resin ne’ebé seidauk rezolve iha munisípiu oioin, inklui Guanabacoa, Habana del Este, La Lisa, no Marianao, haktuir hosi ajénsia notísia Reuters.
Autoridade sira normalmente tenta atu rekupera hosi kolapsu totál liuhosi kria rede enerjia ki’ik no izoladu hodi fornese ospitál sira, sistema bee no fasilidade ai-han nian molok liga fali neineik sentrál sira ne’ebé boot liu.
Série apagamentu nasionál sira
Fallansu iha loron-domingu maka ikus liu iha série apagamentu nasionál sira iha tinan ida-ne’e. Rede ne’e monu dala tolu iha loron neen nia laran iha fulan-Jullu, inklui fallansu rua iha illa tomak iha semana hanesan.
Ida hosi interupsaun sira-ne’e halo ema millaun 10-resin laiha eletrisidade, enkuantu autoridade sira luta atu restaura enerjia tanba nasaun labele hamosu eletrisidade ne’ebé sufisiente atu hatán ba ezijénsia maski rede ne’e liga hikas.
Sistema eletrisidade Kuba nian sai aat tanba falta kombustível no parte substituisaun sira, no mós avaria beibeik iha sentrál termoelétriku sira ne’ebé tuan ona. Fasilidade jeradór balun ho idade liu tinan 30 no hetan ona manutensaun ne’ebé limitadu.
Governu kubanu fó-sala ba Washington, ne’ebé restrinje maka’as fornesimentu petróleu nian ba illa no asesu ba finansiamentu no ekipamentu.
Kuba lakon fonte xave ida ba kombustível hafoin Prezidente Estadu Unidus nian Donald Trump impoin blokeiu petróleu nian iha illa ne’e hafoin EUA nia sekuestru iha loron 3 Janeiru ba Prezidente Venezuela Nicolas Maduro.
Venezuela sai hanesan fornesedór prinsipál petróleu nian ba Kuba, no importasaun sira hosi Méxiku mós paradu tanba presaun ne’ebé aumenta hosi Washington.
Entretantu, sita dékada sira hosi investimentu ne’ebé ladún di’ak no jestaun ne’ebé ladi’ak iha setór enerjétiku.
Interrupsaun sira ne’ebé maka naruk perturba ona transporte, fornesimentu bee, komunikasaun sira no servisu médiku sira. Sira mós husik ona umakain sira ne’ebé luta atu prezerva ai-han, tunu hahán ka toba durante bailoron manas.
Fonte: Aljazeera
