Top

Deputadu Luis Roberto husu MS aselera prosesu rekrutamentu ba profisionál saúde

Profisionál saúde sira halo kampaña nasionál fase liman hodi prevene COVID-19 iha resintu HNGV. Imajen TATOLI/António Gonçalves.

DILI, 16 janeiru 2024 (TATOLI)—Deputadu hosi bankada KHUNTO, Luis Roberto, husu Ministériu Saúde (MS) atu aselera prosesu rekrutamentu ba profisionál saúde hodi prienxe fila-fali rekursu umanu ba atendimentu pasiente sira-ne’ebé menus iha fasilidade saúde sira iha territóriu nasionál.

Notísia Relevante:  Profisionál Saúde 2.256 kontratu konklui no MS foin rekruta no sei simu 229

Nia preokupa ho desizaun ne’ebé la extende kontratu ba kontratadu profisionál saúde hanesan médiku jerál, enfermériu, parteira inklui motorista ambulánsia iha ne’ebé agora fó impaktu tebes ba menus rekursu umanu hodi fó atendimentu ba pasiente sira iha fasilidade saúde sira.

“Hanesan iha ami-nian, iha postu administrativu Venilale (munisípiu Baucau) hapara motorista lori ambulánsia, agora inan isin-rua atu partu tula ba Baucau laiha motorista. Hanoin Governu presiza haree desizaun polítika ne’e tanbá hanesan iha área saúde importante, se lae prezudika atendimentu públika, maibé agora halo ona rekrutamentu hanoin presiza aselera,” nia levanta liuhosi reuniaun plenária PN, tersa ne’e.

Aleinde ne’e, Deputadu hosi bankada opozisaun ne’e preokupa mós problema aimoruk stock out iha fasilidade saúde hosi ospitál nasionál, referál to’o ba sentru ho postu saúde sira iha postu no munisípiu sira.

Deputadu CNRT, Patrocínio Fernandes, hateten kona-ba kontratu ramata ne’e tuir lei natureza kontratu ramata tenke iha fali prosesu adminitrasaun, tanba ne’e hein prosesu rekrumentu ne’ebé daudaun ne’e Ministériu Saúde hala’o hela.

Jornalista : Nelson de Sousa

Editór         : Cancio Ximenes  

Publisidade

Leave a Reply

Latest Post

error: Content is protected !!