VIQUEQUE, 16 janeiru 2024 (TATOLI)—Eskola Ensinu Báziku Filiál (EBF) Osokaiua ne’ebé lokaliza iha área rurál, suku Afaloikai, postu administrativu Uatulari, munisípiu Viqueque, daudaun ne’e menus profesór.
“Iha ha’u-nia eskola, profesór ha’u mesak maka hanorin hosi klase 1 to’o 6 tanba ami laiha profesór, uluk profesór ami hamutuk na’in-tolu maibé na’in-rua fila hikas bá Aman Maromak nia kadunan Santu. Nune’e, ha’u maka hanorin lori matéria sia ba estudante sira ne’e,” Koordenadór Eskola EBF Osokaiua, Marcelino Amaral, informa ba Agência Tatoli, via telefónika, tersa ne’e.
Koordenadór eskola haktuir, durante prosesu aprendizajen, estudante hosi klase 1 no 2 tau hamutuk iha sala ida, inklui klase 3 no klase 4, klase 5 no 6, koloka tempu hanesan maka hanorin estudante tanba kestaun profesór limitadu.
“Ha’u koloka klase sira hanesan ne’e maka tempu la to’o hodi hanorin ita-nia oan sira. Se ha’u la tau estudante sira hamutuk, sei difísil atu fó matéria ba estudante sira,” nia akresenta.
Notísia relevante : EBC Beremau menus profesór disiplina tolu
Marcelino Amaral preokupa tanba oras hanorin estudante sira la sufisiente, ne’ebé nia parte husu ona atu halo rekrutamentu maibé seidauk iha resposta desde tinan kotuk.
“Ha’u hakarak husu ba Ministériu Edukasaun atu rekruta profesór hodi koloka ba área rurál hodi hanorin estudante sira. Ha’u koordenadór depois hanorin tan estudante, dalaruma ha’u koloka tempu la to’o, maibé ha’u nafatin esforsu hanorin estudante sira tanba ha’u kumpre dever serbisu,” nia tenik.
Materia iha EBF Osokaiua kompostu hosi lian portugés, lian tetum, matemátika, siénsia naturál, siénsia sosiál, edukasaun sívika, arte no kultura, inklui relijiaun.
Daudaun ne’e prosesu aprendizajen seidauk la’o tanba anin sobu eskola, ne’ebé daudaun uza uma temporáriu. Semana oin maka foin hahú prosesu aprendizajen.
Tuir dadús EBF Osokaiua iha estudante hamutuk na’in-33, kompostu hosi klase 1 na’in-13, klase 2 na’in-lima, klase 3 na’in-haat, klase 4 na’in-haat, klase 5 na’in-tolu no klase 6 na’in-haat.
Antes ne’e, Diretór Servisu Edukasaun munisípiu Viqueque, Domingos Brandão, rekoñese preokupasaun eskola, tanba ne’e husu ba entidade relevante atu bele rezolve.
“EBF Osokaiua tinan kotuk liubá profesór na’in-ida maka hanorin, prosesu rekruta ne’e iha nasionál maka deside. Ha’u hanoin presiza aumenta profesór hodi hanorin estudante sira tanba profesor na’in-ida labele lori matéria barak, espera Ministériu Edekasaun bele tau atensaun ba asuntu ne’e,” nia dehan.
Jornalista : Vitorino Lopes da Costa
Editora : Julia Chatarina
