DILI, 16 janeiru 2024 (TATOLI) – Tanba falta sala aula iha Sentru Aprendizajen no Formasaun Eskolár (CAFE) Taibessi, iha Dili, ne’ebé akumula alunu 1.300 husi pré-eskolár to’o 12.o anu, eskola públika rua disponibiliza sala aula ba CAFE Dili hodi halo ensinu aprendizajen.
CAFE Dili daudaun iha de’it sala aula 12, nune’e la sufisiente atu akuluma alunu sira hodi partisipa prosesu aprendizajen.
Ho kestaun falta sala aula ne’e, Koordenadór CAFE, Rogério Soares, hatete atu responde ba situasaun ne’e, eskola CAFE Taibessi koordena ho dirijente sira Eskola Sekundária Tékniku Vokasionál (TEKVOK) Otelaria no Turizmu Becora no Eskola Bázika Nuu Laran Xina atubele disponibiliza fatin hodi alunu CAFE sira bele utiliza ba prosesu aprendizajen.
“Maske eskola CAFE laiha sala aula sufisiente, maibé ami nafatin realiza prosesu aprendizajen rutina, tanba daudaun ne’e CAFE Taibessi uza hela sala aula husi eskola Becora, inklui mós sala aula iha eskola bázika Nuu Laran. Ba estudante sira nivel sekundáriu uza sala aula iha CAFE Taibessi, ba estudante primeiru siklu uza sala aula iha Eskola Bázika Sentrál Nuu Laran no ba terseiru siklu uza eskola TEKVOK Becora”, responsavel ne’e esplika iha Vila Verde.
Dirijente ne’e haktuir tan katak utilizasaun sala aula husi eskola sira ne’e provizória de’it hodi hetan konstrusaun foun eskola CAFE nian ne’ebé sei hahú iha tinan ne’e.
“Ami finaliza ona dezeñu konstrusaun eskolah CAFE ho andár rua iha tinan ida ne’e. Ita sei konstrui eskola foun iha Taibessi ho sala aula 15 to’o 20. Espera katak ho apoiu sala aula foun iha tinan ida ne’e, CAFE iha Dili sei la uza tan sala aula eskola seluk nian’’, dehan.
CAFE Dili iha profesór portugés 12 no iha estajiáriu husi Universidade Nasionál Timor Lorosa’e na’in-10. Dixiplina sira iha eskola CAFE ne’e hanorin ho dalen portugés.
Projetu CAFE estabelese liuhusi protokolu ida asinadu iha dezembru 2014 entre Governu Timor-Leste no Portugál. Protokolu ne’e estende tinan ida, iha jullu 2017 no revistu iha dezembru 2019.
Hanesan protokolu Eskola Referénsia, Protokolu Kooperasaun Bilaterál relativu ba Projetu CAFE define eskola sira iha projetu ne’e gratuita, públika, ne’ebé tuir kurríkulu nasionál ofisiál iha dalen portugés (ho esesaun tetun no relijiaun) no kada tinan iha turma foun iha nivel eskolaridade seginte, to’o kobre nivel até 12.o anu. Alterasaun ne’e inklui aumentu númeru másimu estudante kada turma ba 30 no ezije substituisaun graduál manorin portugés sira ho timoroan sira ne’ebé simu formasaun.
Dezde nia kriasaun eskola CAFE ne’e iha progresu signifikativamente. Eskola ne’e komesa kobre ona ninia atividade iha territóriu ho totál alunu hamutuk 10.057.
Projetu CAFE ho objetivu atu mellora kualidade sistema edukativu timoroan, liuhusi hanorin ho dalen portugés no formasaun ba profesór timoroan sira.
Notísia relevante: ME hakarak estende eskola CAFE iha munisípiu tolu
Jornalista: Tomé Amado
Editora: Maria Auxiliadora
