OÉ-CUSSE, 16 janeiru 2024 (TATOLI) – Funsionáriu na’in-86 iha Diresaun Rejionál Agrikultura Rejiaun Administrativa Espesiál Oé-Cusse Ambeno (RAEOA), kontinua servisu ho voluntária hodi apoia servisu agrikultura nian iha Oé-Cusse Ambeno.
Diretór Rejionál Agrikultura, Cirilo dos Remédios Baba, hateten, bazea ba sirkulár hosi Governu katak, loron 31 dezembru 2023 funsionáriu kontratadu sira-nia kontratu remata.
Tan ne’e atu atu kontinua renova kontratu no hapara, parte diresaun Agrikultura seidauk iha koñesimentu tanba to’o agora seidauk iha karta formál ruma hosi Governu atu renova ka hapara.
“Ita-nia funsionáriu kontratadu sira na’in-86 servisu iha Sekretáriu Rejionál Agrikultura, agora daudaun sira sei hein kontratu foun tanba kontratu remata ona iha loron 31 dezembru 2023 ne’e,” Cirilo dos Remédios Baba, ba Agência Tatoli iha Oé-Cusse, tersa ne’e.
Notísia relevante: Produsaun batar no hare durante tinan tolu iha Oé-Cusse hatudu mudansa
Nia informa, daudaun ne’e diresaun hato’o ona funsionáriu kontratadu sira-nia naran ba iha Governu Sentrál liuhosi Ministériu Agrikultura, atubele haree, tanba funsionáriu hirak-ne’e, la’ós foin maka servisu iha diresaun agrikultura Oé-Cusse maibé kuaze tinan 10 ona.
“Tan ne’e, ha’u nu’udar dirijente ba diresaun ne’e, ha’u labele hateten, sira-nia kontratu hapara ou la’e, tanba ne’e la’ós ha’u-nia kompeténsia, no ha’u lahateten ba sira, atu labele mai ona servisu ou mai, tanba ita seidauk simu sirkulár no karta legál ruma hosi Governu,” nia informa.
Tanba ne’e, prinsipalmente katak, sira kontinua nafatin, servisu hanesan bainbain, balu servisu iha terrenu hodi kontinua hein desizaun Governu nian kona-bá sira-nia kontratu.
Tuir nia, sekuandu Governu bainhira hato’o karta legál ruma liga ho kontratu sira-ne’e, kuandu la renova funsionáriu sira-nia kontratu ne’e, sei afeta maka’as ba servisu agrikultura nian iha Oé-Cusse.
“Tanba iha agrikultura, tékniku estensionista barak iha baze, guarda floresta sira no tékniku sira seluk iha departamentu sira barak servisu hamutuk komunidade, entaun presiza renova sira-nia kontratu tanba sira-ne’e servisu tinan barak ona iha Oé-Cusse,” nia katak.
Notísia relevante:MAP halo levantamentu dadus iha Oé-Cusse ba programa ‘habelar no habokur’ animal
Entretantu, totál funsionáriu iha Diresaun Rejionál Agrikultura Oé-Cusse hamutuk 208, komposta hosi permanente 87, ajente administrativu 31, kontratadu 86, kontratadu la ho grau I no nomeasaun polítiku na’in-tolu.
Jornalista: Abílio Elo Nini
Editór: Evaristo Soares Martins
