Komisaun G rekomenda Governu hasa’e kualidade edukasaun
DILI, 16 janeiru 2024 (TATOLI)—Prezidente Komisaun G trata asuntu Edukasaun, Juventude, Desportu no Kultura iha Parlamentu Nasionál (PN), Deputadu Armando dos Santos Lopes, rekomenda Governu atu investe iha área edukasaun hodi bele hasa’e kualidade edukasaun iha Timor-Leste.
Notísia Relevante: Profesór kontratadu sira ameasa ‘boikota’ rekrutamentu ba bolsa kandidatu
Tanba, nia hateten, problema edukasaun durante ne’e hosi primeiru Governu to’o mai ohin loron seidauk rezolve nafatin, nune’e asuntu edukasaun sai nafatin preokupasaun Deputadu sira-nian iha PN sempre levanta no mós sai polémika ba manorin sira-ne’ebé iha baze enfrenta daudaun akontese.
“Ko’alia kona-ba kualidade edukasaun vontade no seriedade presiza iha asaun no konsensu atu atinje kualidade edukasaun. Tanba, kualidade edukasaun ne’e fatór barak determina ba infraestrutura bázika, manorin sira, kuríkulu no mós kompeténsia haat profesór sira,” Prezidente Komisaun G ne’e hateten ba Agência Tatoli iha uma fukun PN, iha ámbitu komemorasaun loron Internasionál Edukasaun ne’ebé mundu tomak sei komemora kada tinan iha loron 24 fulan janeiru, tersa ne’e.
Nia hatutan, kompeténsia haat profesór sira-ne’ebé iha ne’eba mós determina lian portugés sai fatór importante mós presiza manorin sira domina ida-ne’e, tanba ida-ne’e transfere matenek ba alunu sira.
Iha profesór kuaze 50% seidauk hanorin ho língua portugés no iha kuríkulu hatuur lian portugés, hanoin ida-ne’e mós fatór ida TL nia problema oinsá mak bele rezolve, tanba asuntu kualidade edukasaun refere mós ba kualidade profesór.
Aleinde inklui sei falta laboratóriu, tanba laboratóriu hanesan meiu ida prova teória loos ka lae nune’e presiza prátika saida mak alunu sira aprende hosi teória.
“Governu nia mai hosi povu, entaun Governu nia programa oinsá atu rezolve problema edukasaun iha Timor-Leste liuliu povu nia oan. Tanba ho edukasaun ita bele rezolve problema nasaun nian iha futuru, sein edukadu ka laiha matenek ita sei la rezolve problema,” nia hateten.
Nia konsidera alokasaun orsamentu durante ne’e ba área edukasaun sufisiente, tanba ida-ne’e tenke tuir TL kapasidade ezekusaun, ne’ebé bele rezolve problema sira ho fazeadamente kada tinan.
Prezidente Komisaun G ne’e hateten, problema edukasaun sei nafatin atu Governu foun ida mai mós nia sei rezolve sei la hotu, tanbá edukasaun ne’e relasaun ho ema no ema ne’e iha dezenvolvimentu kada minutu ka tinan.
Ne’eduni, nia dehan, problema edukasaun nafatin tuir evolusaun umanu ne’ebé la’o maibé TL nafatin investe hodi hasa’e kualidade edukasaun ne’e rasik.
Prezidente Komisaun G iha PN ne’e hato’o ninia mensajen iha loron internansionál edukasaun hodi fanun ema atu nafatin fó importánsia ba setór ne’e, oinsá hasa’e kualidade edukasaun hodi forma jerasaun foun sira ho kualidade serbi nasaun ne’e iha futuru.
“Ho loron ne’e atu fanu ita hodi bele hare fila-fali ita-nia meiu ne’ebé ita halo, oinsá mak eduka timoroan sira, tanba edukasaun ne’e importante tebes alunu sira-ne’e sai ita-nia alvu. Tanba ida-ne’e mak iha futuru atu dezenvolve nasaun ita presiza tenke hanorin ema-ne’ebé iha kualidade duni,” nia dehan.
Jornalista : Nelson de Sousa
Editór : Cancio Ximenes
