DILI, 15 janeiru 2024 (TATOLI) – Profesór 1.499 ne’ebé termina kontratu iha 31 dezembru 2023 ameasa sei boikota planu Ministériu Edukasaun (ME) nian atu loke rekrutamentu ba bolsa kandidatu ba manorin 1.500 iha pré-eskolá no ensinu báziku iha tinan ida ne’e.
Portavós profesór kontratadu, Agostinho Pinto, afirma katak polítika ME nian atu loke rekrutamentu ba bolsa kandidatu ne’e loloos dirije de’it ba kandidatura ka ema sira ne’ebé maka seidauk sai profesór mak bele konkorre vaga ida ne’e, maibé ba profesór sira ne’ebé maka hanorin tinan 10-resin laiha direitu atu tuir vaga ida ne’e.
“Ami profesór 1.499 ne’ebé hanorin kuaze tinan 10 ona no hetan ona rekoñesimentu husi ita-nian Estadu, liuhusi Governu anteriór ne’e laiha tan hanoin ida atu bá tuir teste iha bolsa kandidatu ne’e, tanba ami la’ós profesór foun”, nia afirma iha, Vila Verde, ohin.
Tuir portavós, bainhira sira-nian ezijénsia ne’ebé hato’o ba Ministériu Edukasaun atu hetan avaliasaun mak lahetan resposta husi Ministériu Edukasaun, sira sei organiza profesór sira hotu iha territóriu atu halo boikota ba rektutamentu bolsa kandidatu ne’ebé ministériu loke.
Nia salienta katak rejime espesiál prevee ona iha estatutu ho baze ba dekretu-lei númeru 31/2023 katak ME laiha razaun atu hapara kontratu profesór 1.499 ne’ebé fó dalan ba sira atu tama iha rejime espesiál.
“Ohin, ami mai iha Ministériu Edukasaun atu husu legalidade ba superiór sira kona-ba sira-nian deklarasaun katak ami-nian kontratu ne’ebé termina iha 31 de dezembru 2023 ne’e laiha ona direitu atu hamriik tan iha sala aula laran atu hanorin estudante sira”, dehan Agostinho Pinto.
Tanba ne’e, bainhira ME atu halo rekrutamentu bolsa kandidatu ne’e presiza rezolve uluk problema manorin kontratadu ne’ebé hanorin tinan 10 ona hodi tama tiha bá rejime espesiál, kestaun profesór reklamante no voluntáriu nian maka foin bele loke bolsa kandidatu ba manorin foun sira. “Maibé, bazeia ba esplikasaun asesór legál ME nian katak profesór 1.499 laiha ona direitu atu tama iha rejime espesiál tanba seidauk iha avaliasaun dezempeñu”, haktuir.
Nia salienta Lei Komisaun Funsaun Publika (KFP) hatete periódu avaliasaun dezempeñu ba funsionáriu públiku no ajente administrasaun públika hahú iha janeiru to’o iha marsu, maibé sira dehan labele ona.
Tuir Koordenadór Gabinete Apoiu Jurídiku, Yajalde Rodrigues, direitu profesór 1.499 ne’ebé ninia kontratu termina ona iha 31 dezembru ne’e pervalese tuir lei. “Sé lei ne’e maka hateten hanesan ne’e, entaun tenke halo konfirmasaun tuir lei. Agora, ba direitu profesór kontratadu ne’ebé maka hetan ona avaliasaun dezempeñu ne’e tanba sira prienxe ona rekizitu sira tenke iha abilitasaun literária minímu diploma III ba leten” esplika.
Aleinde ne’e, avaliasaun dezempeñu profesór sira-nian ne’e tenke rejistu ona iha SIGAP Komisaun Funsaun Publika, nune’e mos sira tenke asina kontratu antes 2023. Agora, ba profesór kontratau 2023 nian konsidera lahetan avaliasaun dezempeñu tanba la estende kontratu, nune’e maka sira lahetan direitu atu hetan avaliasaun dezempeñu. “Maibé profesór sira sei marka fali prezensa bainhira superiór ME na’in-rua ne’e iha ona fatin atu sira bele hetan filafali esplikasaun detallada”, dehan.
Iha audiénsia ne’ebé ohin manorin kontratadu sir halo ME ne’e laiha prezensa husi Ministra Dulce de Jesus, no Sekretáriu Estadu Ensinu Sekundáriu Jerál no Ensinu Sekundáriu Tékniku-Vokasionál, Domingos Lemos, tanba halo misaun iha li’ur.
Notísia relevante: Ministériu Edukasaun sei rezolve problema manorin sira ho bolsa kandidatu iha 2024
Jornalista: Tomé Amado
Editora: Maria Auxiliadora
