DILI, 16 janeiru 2024 (TATOLI)—Ministériu Agrikultura Pekuária Peska no Floresta (MAPPF), liuhosi Diresaun Nasionál Agrikultura no Ortikultura, iha fulan ne’e nia laran sei distribui ai-moruk kombate peste karakól ba agrikultór sira iha territóriu laran.
Diretór Nasionál Agrikultura no Ortikultura, Lúcio Ribeiro, hateten, ministériu sosa ona ai-moruk kombate peste karakól hodi distribui ba agrikultór sira ne’ebé hahú halo atividade agrikultura ba époka dahuluk tinan ne’e.
“Husu ba agrikultór sira, tantu halo natar no kuda modo nian, labele preokupa ho ai-moruk kombate peste karakól nian tanba ai-moruk ba époka dahuluk tinan ne’e to’o ona no ita sei distribui hahú fulan ne’e nia laran,” Diretór informa ba Agência Tatoli, via telefónika, tersa ne’e.
Notísia relevante : MAP fahe fini batar no hare kulit 300 tonelada iha tinan 2022
Ministériu sosa ai-moruk kombate peste karakól litru 12.000 ho kustu $90.000.
“Ita sei distribui hotu ba agrikultór sira iha munisípiu ne’ebé peste maka’as liu, inklui mós agrikultór sira hosi Tampo-Memo Bobonaro ne’ebé preokupa peste no husu ai-moruk, sira sei hetan hotu,” nia akresenta.
Jornalista : Arminda Fonseca
Editora : Julia Chatarina
