BOBONARO, 16 janeiru 2024 (TATOLI)-Motorista carro Funeráriu hosi Diresaun Servisu Munsisipál Asaun Sosiál, Autoridade Munisípiu Bobonaro, deside hatún mate-isin ida dalan parte mota Laku ninin ne’ebé baliza entre suku Aiasa ho suku Subuni, postu administravu Bobonaro ho razaun tanba klima ladi’ak, atu transporta mate-isin ne’e ba to’o fatin destinasaun.
Asuntu ne’e relata hosi Diretora Asaun Sosiál Munisípiu Bobonaro, Eurosia Maria Marques Doutel Sarmento, hatán imformasaun ne’ebé espalla iha mídia sosiál katak motorista carro funeráriu hosi Autoridade Munisípiu Bobonaro hatún mate-isin iha dalan klaran parte mota Laku la ho razaun.
Diretora Eurosia lamenta no rejeita ho informasaun ne’ebé individu ida lansa iha mídia sosiál Facebook, tanba la bazea ba faktu ne’ebé akontese iha terrenu.
“Informasaun ne’ebé lansa iha mídia sosiál ne’e laloos, tanba iha dia 13 janeiru to’o agora ne’e udan la para, klima ladi’ak, ita hatene katak mota tún, oinsá ho medan ne’ebé ita atu transporta mate-isin ba Subini, ne’e fatin perigu tebes, maibé kondutór konsege tula to’o iha-ne’ebá, bainhira mota boot labele ultrapasa,” nia informa ba Tatoli iha Maliana, tersa ne’e.
Dirijente Servisu Munisipál Asaun Sosiál Munisípiu Bobonaro ne’e informa, desizaun ne’e motorista foti bazea ba konkordánsia ho família matebian.
“Bainhira mota tún maka labele ultrapasa, konserteza tenke ser hatún iha-ne’ebá, família bele buka maneira oinsá atubele lori to’o iha nia uma, sé karik laiha mota mak bele ultrapasa, wainhira mota tún labele, tanba ita haree mota ne’e la’os ki’ik-oan, mota boot rua kedas ne’ebé ita labele ultrapasa.”
Enkuantu akontesimentu ne’e akontese iha sábadu, 13 janeiru ne’e, maibé to’o agora seidauk iha família matebian reklama ka keisa ba Diresaun Servisu Munisipál Asaun Sosiál Munisípiu Bobonaro.
Diretora ne’e esklarese, servisu transportasaun mate-isin ne’ebé diresaun asaun sosiál halo bazea ba lei, regra sira-ne’ebé iha no sei la haree ba kór ho rasa.
“Ha’u atu dehan povu ida-ne’e, hotu-hotu iha direitu atu hetan atendimentu ne’ebé hanesan kualkér sé de’it, atu kalan, loron, atu ema feto, mane, ferik ho katuas, ema ho defisiénsia ne’ebé presiza tulun, ami sempre 24 oras atu apoia,” nia informa.
Nia husu ba públiku, bainhira lamenta ho atendimentu ne’ebé ekipa Asaun Sosiál halo iha terrenu, bele hato’o krítika ho maneira formál liuhosi autoridade lokál sira-ne’ebé hanesan matan no ibun ba povu.
“La’ós ita lansa informasaun iha mídial sosiál ne’ebé mak la ho faktu no evidénsia ne’ebé forte, tanba durante ne’e ha’u la’o ona ba postu sira, halo sosializasaun kona-bá kna’ar no reponsablidade oinsá atendimentu ba transportasaun mate-isin no apoia kaixaun. Ida-ne’e ha’u fahe ona informasaun ba komunidade liuhosi autoridade lokál, tanba sira iha ona koñesimentu kona-bá prosesu no kritériu sira,” nia katak.
Enkuantu tuir dadaus ne’ebé iha durante tinan 2023, Diresaun Asaun Sosiál Autoridade Munisípiu Bobonaro tranporta ona mate-isin hamutuk 280 no hahú fulan jeneiru to’o agora ne’e hamutuk 16.
Jornalista: Sérgio da Cruz
Editór: Evaristo Soares Martins
