iklan

HEADLINE, SAÚDE

MS husu dirijente HNGV servi ho fuan lori saúde ne’ebé di’ak ba povu

MS husu dirijente HNGV servi ho fuan lori saúde ne’ebé di’ak ba povu

Vise-Primeiru-Ministru, Ministru Asuntu Sosiál no Ministru Dezenvolvimentu Rurál no Abitasaun Komunitáriu, Mariano Assanami Sabino, akompaña hosi Ministra Saúde, Elia dos Reis Amaral, hala'o vizita traballu urzensia ba Hospital Nasional Guido Valadares, tersa (16/01). Imajen Tatoli/Francisco Sony

DILI, 16 janeiru 2024 (TATOLI) – Ministra Saúde husu ba dirijente sira iha Hospitál Nasionál Guidu Valadares (HNGV), atu servisu ho fuan hodi lori saúde ne’ebé di’ak ba povu.

“Ha’u husu ba dirijente na’in-haat ne’ebé mak ohin simu pose atu servisu ho fuan ho laran, atu  lori saúde ne’ebé di’ak ba povu no dignifika no valoriza povu nia moris hanesan prezente ida ne’ebé mak fó ba ita atu kuidadu sira ho domin”, Ministra Saúde Elia dos Reis Amaral dehan iha nia diskursu bainhira fó pose ba dirijente na’in-haat husi HNGV iha salaun Palásiu Sinzas, ohin.

Nia enkoraja ba dirijente HNGV atu servisu ho profisionál hodi hametin atendimentu di’ak ba populasaun sira iha Timor-Leste.

“Ha’u fiar katak dezafiu no obstákulu sira sei mosu, maibé ida-ne’e la’os atu hamate ita-nia vontade atu servisu ba atendimentu ema nian moris, tanba ne’e ho esforsu tomak sei sai realidade katak tenke servisu ho domin ba ita-nia pasiente sira”, nia revela.

Iha fatin hanesan, Diretora Servisu Administrasaun Finansas no Lojístika, Sara Maria Xavier, agradese ba konfiansa tomak ne’ebé mak fó atu hala’o servisu iha HNGV, nomeadamente programa no prioridade ne’ebé atu ezekuta hanesan hadia baze dadus rekuru umanus nian.

“Ha’u simu kargu ida-ne’e hanesan Diretora Servisu Administrasaun Finansas no Lojístika nia prioridade mak atu hadia baze dadus rekursu umanus nian, suku farda ba profisionál saúde. Reabilita edifísiu no análize fila fali forsa trabalhu ne’ebé mak koloka iha HNGV, aleinde ne’e ezekuta Orsamentu Jerál Estadu ne’ebé mak iha no oinsá atu reabilita ba edifísiu sira iha HNGV”, Sara promete.

Konsellu Diretivu foun iha HNGV ne’ebé nomeadu mak Sara Maria Xavier nu’udar Diretora Servisu Administrasaun no Finansas, Ana Maria Magno nu’udar Diretora Asisténsia Klínika,Vidal de Jesus Lopez nu’udar Diretór Servisu Apoiu Diagnóstiku Therapeútiku, Maximiniana L.S. nu’udar Diretora Servisu Enfermajen.

Notísia relevante : Ministra Elia ezonera diretór na’in-haat iha HNGV

Jornalista : Felicidade Ximenes

Editór : Zezito Silva

 

iklan
iklan

Leave a Reply

iklan
error: Content is protected !!