Deputadu CNRT husu MKI hadi’a mekanizmu implementa subsídiu foos faze daruak
DILI, 17 janeiru 2024 (TATOLI)—Deputadu hosi Bankada CNRT iha Parlamentu Nasionál (PN), Patrocínio Fernandes dos Reis, husu Governu liuhosi Ministériu Komérsiu Indústria (MKI) kontinua implementa subsídiu foos ba faze daruak, atu bele hakman povu nia terus maibé presiza hadi’a mekanizmu.
Notísia Relevante: Empreza importadora rua sei ezekuta subsídiu foos faze daruak
“Se Governu iha polítika atu kontinua ne’e signifika katak nesesidade ba subsídiu ba foos ne’e kontinua iha. Agora ita hanoin mak karik iha mekanizmu ruma presiza atu hadia di’ak,” Deputadu bankada CNRT ne’e hateten ba jornalista sira iha uma fukun PN, kuarta ne’e.
Tanba ne’e, nia dehan, iha desizaun kontinua implementa subsídiu ba foos ne’e hanoin buat ne’ebé di’ak, atu hatan ba ezijénsia merkadu no hatan ezijénsia povu tomak nian ne’e polítika di’ak.
Nune’e, husu atu Governu tenta hadi’a mak mekanizmu sira-ne’ebé mak durante ne’e sai preokupasaun públiku ne’e nian iha prosesu distribuisaun karik, no prosesu oinsá mak identifika merkadu sira-ne’ebé presiza liu atu halo intervensaun ho subsídiu foos ida-ne’e.
Nia apresia polítika IX Governu Konstitusionál kontinua polítika ne’e iha faze daruak no importante ba ezijénsia povu nian iha fatin atu kontinua.
Deputadu FRETILIN, Antonino Doutel, hateten folin foos sai nafatin povu nia preokupasaun iha territóriu nasionál.
Maibé, nia prefere tuir loloos fó subsídiu direta ba agrikultór sira hodi dezenvolve agrikultura hodi hasa’e produsaun iha rai-laran, atu fasilita povu sira iha baze, mezmu nune’e Governu implementa nia polítika seluk, nune’e hakarak rekomenda mak halo intervensaun foos atu ba to’o área rurál sira hodi povu hotu bele asesu.
Enkuantu, Ministériu Komérsiu Indústria (MKI) asina ona kontratu ho empreza Kreatif Furak no Alfa Dili hodi bele faan foos ba komunidade iha territóriu ba faze daruak ba foos kilograma 20 ho presu $10 no kilograma 25 ho presu $11. 50 sentavu, nune’e ho polítika ne’e hodi halo intervensaun presu foos iha merkadu ne’ebé daudaun sa’e.
Notísia Relevante: Hahú ohin, Alfa Dili fa’an foos subsídiu ‘Golden Star’
Jornalista : Nelson de Sousa
Editór : Cancio Ximenes
