DILI, 17 janeiru 2024 (TATOLI)–Institutu Nasionál Estatístika Timor-Leste, Institutu Públiku (INETL, I.P) lansa relatóriu mudansa persentajen Índise Presu Konsumedór (IPK) ba dezembru 2023, ne’ebé hatudu grupu hotu sa’e +0,3%, kompara ho fulan-novembru ne’ebé sa’e +0,2%.
Dadus INETL hatudu katak mudansa presu grupu hotu +0,3% tanb hetan kontribuisaun hosi grupu hahán no bebida la’ós alkoólika +0,6%, hatais no sapatu +1,2%, grupu alkoólika no tabaku -0,6%, uma -0,4%, transporte -0,3%), ekipamentu no manutensaun mobiliáriu uma-laran -0,1% sai hanesan mudansa kontráriu ba inflasaun grupu hotu.
“Grupu hahán no bebida la’ós alkoólika sa’e +0,6% tanba hetan impaktu maioria hosi sub grupu modo tahan +3,1%, susu-been, keiju no manutolun +0,5%, kafé, xá, no kokoa +0,4%, ikan no hahán tasi +0,2% no na’an +0,1%. Sub grupu mina no bokur -0.5%, masin-midar, marmelada, bani-been, Cokolate, no hahán midar -0,2% no ai-fuan -0,3% sai hanesan mudansa kontráriu ba inflasaun grupu hahán no bebida la’ós alkoólika,” Prezidente INETL, I.P, Elias dos Santos Ferreira informa, hafoin lansa relatóriu mensál iha edifísiu INETL, I.P, Caicoli, kuarta ne’e.
Notísia relevante : IPK grupu hotu sa’e +0,5% iha agostu 2023
Nia esplika, mudansa persentajen IPK anuál sa’e +8,7%, kompara entre dezembru 2023 ho dezembru 2022, ne’ebé hetan kontribuisaun hosi grupu hahán no bebida la’ós alkoólika +12,4%, alkoólika no tabaku +23,6%, edukasaun +7,0%, hatais no sapatu +0,6%, no komunikasaun +0,7% ba anuál dezembru 2023.
“Grupu transporte -2,6%, uma -0,4%, rekreasaun no kultura -1,7%, no ekipamentu no manutensaun mobiláriu uma-laran -3,2% sai hanesan mudansa kontráriu ba inflasaun grupu hotu ba anuál dezembru 2023,” jerente institutu ne’e akresenta.
Inflasaun tradeable sa’e +0,3% no Non-Tradeable mos sa’e +0,3% iha mensál, kompara entre dezembru 2023 ho novembru 2023. Nune’e, inflasaun tradeable sa’e +10,8% no non-tradeable mós sa’e +3,2% iha anuál, kompara entre dezembru 2023 ho dezembru 2022.
Jornalista : Antónia Gusmão
Editora : Julia Chatarina
