DILI, 21 setembru 2023 (TATOLI)–Institutu Nasionál Estatístika Timor-Leste, Institutu Públiku (INETL, I.P) lansa relatóriu Índise Presu Konsumidór (IPK) agostu 2023, ne’ebé hatudu mudansa persentajen ba grupu hotu mensál sa’e ba +0,5% kompara ho jullu sa’e +0,3%.
Dadus hosi INTL ne’e hatudu katak mudansa presu grupu hotu +0,5% tanba hetan kontribuisaun hosi hahán no bebida la’ós alkoólika -0,5%, transporte -0,8%, ekipamentu no manutensaun mobiliáriu uma-laran -0,3%, sai hanesan kontráriu ba inflasaun grupu hotu.
“Enkuantu, grupu hahán no bebida la’ós alkoólika sa’e +1,2% tanba hetan impaktu hosi sub grupu foos +3,3%, modo tahan +2,3%, ai-fuan +1,4%, masin-midar, marmelada, bani-been, xokolate no hahán midar +0,3% no na’an +0,3%. Sub grupu mina no bokur -2,1%, susu-been, keiju no manu-tolun -0,7% no produtu ai-han -0,2% sai hanesan mudansa kontráriu ba inflasaun grupu hahán no bebida la’ós alkoólika,” Prezidente INETL, I.P, Elias dos Santos Ferreira, informa liuhosi nota ne’ebé Agência Tatoli asesu, kinta ne’e.
Notísia relevante : IPK grupu hotu tun ba +0,3% iha jullu 2023
Nia esplika, mudansa persentajen IPK anuál sa’e +7,7% kompara entre agostu 2023 ho agostu 2022, ne’ebé hetan kontribuisaun hosi grupu hahán no bebida la’ós alkoólika +9,8%, alkoólika no tabaku +32,2%, edukasaun +7,0%, hatais no sapatu +1,7%, komunikasaun +0,6% no uma +0,1% ba anuál jullu 2023.
“Grupu transporte -6,9%, rekreasaun no kultura -1,1%, ekipamentu no manutensaun mobiláriu uma-laran -2,2% no uma -0,1% sai hanesan mudansa kontráriu ba inflasaun grupu hotu ba anuál agostu 2023,” Jerente institutu akresenta.
Inflasaun tradeable sa’e +0,8% no non tradeable tun -0,1% iha mensál, kompara entre agostu 2023 ho jullu 2023. Inflasaun tradeable sa’e +9,8% no non tradeable sa’e +2,6% iha anuál, kompara entre agostu 2023 ho agostu 2022.
Jornalista : Antónia Gusmão
Editora : Julia Chatarina
