DILI, 22 agostu 2023 (TATOLI)–Institutu Nasionál Estatístika Timor-Leste, Institutu Públiku (INETL, I.P) lansa relatóriu Índise Presu Konsumidór (IPK) jullu 2023, ne’ebé hatudu mudansa persentajen ba grupu hotu mensál tun ba +0,3% kompara ho juñu sa’e +0,6%.
Dadus hosi INTL ne’e hatudu katak mudansa presu grupu hotu +0,3% tanba hetan kontribuisaun hosi hahán no bebida la’ós alkoólika alkoólika +0,6%, grupu transporte -0,7%, hatais no sapatu -0,2, ekipamentu no manutensaun mobiliáriu uma-laran -0,1%, komunikasaun -0,2% no alkoólika no tabaku -0,1% sai hanesan kontráriu ba inflasaun grupu hotu.
“Enkuantu, grupu hahán no bebida la’ós alkoólika sa’e +0,6% tanba hetan impaktu hosi sub grupu modo tahan +0,6%, foos +0,5%, produtu ai-han +2,7%, masin-midar, marmelada, bani-been, xokolate no hahán midar + 1,9% no susubeen, keiju no manutolun +0,4%. Sub grupu aifuan -0,6%, no ikan no hahán tasi -0,4% sai hanesan mudansa kontráriu ba inflasaun grupu hahán no bebida la’ós alkoólika,” Prezidente INETL, I.P, Elias dos Santos Ferreira, informa liuhosi nota ne’ebé Agência Tatoli asesu, tersa ne’e.
Notísia relevante : IPK grupu hotu kontinua sa’e iha juñu 2023
Nia esplika, mudansa persentajen IPK anuál sa’e +7,1% kompara entre jullu 2023 ho jullu 2022, ne’ebé hetan kontribuisaun hosi grupu hahán no bebida la’ós alkoólika +8,4%, alkoólika no tabaku +32,5%, edukasaun +7,0%, hatais no sapatu +1,8%, komunikasaun +0,6% no uma +0,1% ba anuál jullu 2023.
“Grupu transporte -5,9%, rekreasaun no kultura -1,1%, ekipamentu no manutensaun mobiláriu uma-laran -2,5% sai hanesan mudansa kontráriu ba inflasaun grupu hotu ba anuál jullu 2023,” Jerente institutu akresenta.
Inflasaun tradeable sa’e +0,3% no non tradeable mós sa’e +0,2% iha mensál, kompara entre jullu 2023 ho juñu 2023. Nune’e, inflasaun tradeable mantein +8,8% no non tradeable sa’e +2,8% iha anuál, kompara entre jullu 2023 ho jullu 2022.
Jornalista : Antónia Gusmão
Editora : Julia Chatarina
