DILI, 17 janeiru 2024 (TATOLI)—Ministériu Agrikultura Pekuária Peska no Floresta (MAPPF) liuhosi Diresaun Nasionál Dezenvolvimentu Floresta Komunitária (DNDFK), iha janeiru to’o dezembru 2023, konsege rekolla reseita hamutuk $149.753,42 liuhosi atividade no produtu floresta.
“Reseita hosi produtu floresta mak hanesan atendimentu lisensa, tula ai-teka metan no mutin, lisensa tula ai-sunu, no ai-sunu ne’ebé guarda florestál halo apreensaun, inklui reseita maihosi lisensa exportasaun kulak (nehek ten) ba nasaun Indonézia,” Diretór Nasionál Dezenvolvimentu Floresta Komunitária, Pascoal Barros do Carmo, informa ba Agência Tatoli, iha ninia knaar fatin Caicoli, kuarta ne’e.
Notísia relevante : Selebra Loron Floresta : Governu mobiliza ona Ai-kameli 2.000 kuda iha foho Balak
Atividade sira ne’ebé hala’o mak hanesan rekolla reseita hosi produtu floresta ba lisensa tula no lisensa tesi ne’e bazeia ba despaixu MAPPF númeru 10/2011, no depaixu hosi liña jerál floresta nian númeru 70/2020, ho baze legál sira hosi atividade halo atendimentu ba komunidade.
Totál reseita akumuladu konta hahú hosi janeiru $11.44,50 fevereiru $6.769 marsu $17.093,79 abríl $9.997,53, maiu $12.898,70, jullu $12.252,20, agostu $15.264,40 setembru $12.473,60 outubru $14.421,65 novembru $12.808,75, no dezembru $10.044,75.
Jornalista : Arminda Fonseca
Editora : Julia Chatarina
