DILI, 17 janeiru 2024 (TATOLI)—Parlamentu Nasionál (PN) liuhosi Prezidente Komisaun A trata asuntu Justisa no Konstituisionál, Deputadu Patrocínio Fernandes dos Reis, apresia esforsu Ministériu Justisa (MJ) ba pasaporte hamutuk 20.650 to’o ona iha Timor-Leste, nune’e sujere atu mellora atendimentu públiku hodi trata pasaporte iha serbisu rejistu notariadu.
Notísia Relevante: Passaporte 20.650 ‘’Chega’’ Dili sei atende ho online, munisípiu seidauk
Nia hateten, ne’e serbisu ida Governu nian no obrigasaun ida tenke halo Parlamentu Nasionál nafatin fó korajen ba membru Governu sira tenke serbisu ho di’ak tau atensaun konsentra atu halo oinsá fó asisténsia ba públiku ninia ezijénsia.
“Ita ezije responsabilidade membru Governu sira atu serbisu ho responsabilidade, profisionalizmu hodi bele redús rezolve probelma sira-ne’ebé sai nu’udar ezijénsia públiku ninian. Ita hotu komprende prosesu sira-ne’e la’ós prodús iha ita-nia rain tenke iha ema-nia rai. Ne’ebé, fasilidade sira iha hodi responde ne’ebé pasaporte mai ona, liga kestaun tékniku atu halo atendimentu online. Ami nu’udar reprezentante povu nia interrese mak ne’e atendimentu ba públiku ninia nesesidade no fó asisténsia ema presiza pasaporte. Kaderneta iha halo tratamentu buka meiu oinsá simplifika prosesu sira atu públiku asesu ho di’ak,” Prezidente Komisaun A ne’e hateten ba jornalista sira iha uma fukun PN, kuarta ne’e.
Deputadu FRETILIN, Antonino Doutel, apresia esforsu Ministériu Justisa ba pasaporte ne’ebé to’o ona iha Timor-Leste hodi bele atende nesesidade públiku nian, tanba durante ne’e sai preokupasaun públiku nian.
“Esforsu ministériu nian buat sira-ne’e to’o daudaun ona país, ita buka ministériu ema tékniku sira hodi funsiona di’ak atu fasilita ba sidadaun sira-ne’ebé presiza kaderneta pasaporte ne’e rasik,” nia hateten.
Tanba ne’e, nia sujere mellora atendimentu ba sidadaun sira-ne’ebé atu ba trata pasaporte, tanba durante ne’e atu ba trata sidadaun sira sempre forma naruk no dudu malu.
Tan ne’e, hein katak serbisu notariadu bele halo atendimentu ho meiu online ne’ebé sei lansa iha tempu badak hodi fasilita liután sidadaun sira.
Jornalista : Nelson de Sousa
Editór : Cancio Ximenes
