BOBONARO, 17 janeiru 2024 (TATOLI)-Diresaun Servisu Munisipál Protesaun Sivíl no Jestaun Risku Dezastre Munisípiu Bobonaro, rejista uma-kain 20 resin mak vítima ba dezastre naturál hafoin akontese udan no anin-boot hahú iha semana daruak fulan-jeneiru 2024 ne’e.
Diretór Servisu Munisipál Protesaun Sivil jestaun Risku dezastre Munisípiu Bobonaro, António Soares, esplika vítima hirak-ne’e mai hosi postu administrativu Balibo hamutuk uma (8), aldeia odelgomo.
Parte suku Aiasa, postu administrativu Bobonaro hamutuk 16, suku Malilait ida no Tebabui ida.
“Ami konta hamutuk ne’e 20-resin, iha Balibo nia ami fó ona apoiu emerjénsia no iha Aiasa ne’e mak ami foin halo verifikasaun, tuir planu aban ami sei tún ba fó apoia emerjénsia ho razaun estrada ladi’ak, horibainhira ba verifika ami la’o de’it oras haat nia laran,” nia imforma ba jornalista sira iha Maliana, kuarta ne’e.
Dirinjente másimu servisu Munisipál Protesaun Sivíl, jestaun Risku Dezastre Munisípiu Bobonaro ne’e fundamenta, tuir dadus identifikadu uma hirak-ne’e balu hetan estragus totál, estragu natoon, maibé barak liu mak estragus kmaan.
“Sira-ne’e kuaze anin sobu de’it balu kalen de’it no rua mak ahi haan. Nne’e bazea ba dekretu lei 07/2021, ita haree ba kategoria kuaze aat kmaan mak barak liu, balu ami dehan labele hetan rekuperasaun, entaun sira na’in hadi’a fila fali, maibé ba sira-ne’ebé mak aat totál ne’e ita sei foti dadus entrega ba autoridade protesaun sivíl atu hetan apoia rekuperasaun,” nia katak.
Nia parte hamutuk ho Autoridade Protesaun Sivíl pronta atu apoia kualkér tempu bainhira akontese dezastre naturál, maibé nia alerta diak liu komunidade sira ho konsiénsia rasik tenke hadook-aan hosi fatin sira-ne’ebé konsideradu risku.
“Sira halo uma ita lahatene, liuliu ba sira-ne’ebé mota ibun tún ba Cailaco, Atabae, ba sira-ne’ebé anin-boot hanesan Bobonaro no Lolotoe, sé bele prepara-aan antes, asegura-aan no dokumentu ne’ebé importante no rikusoin sira-ne’e bele lori, tenke tau iha fatin ne’ebé seguru,” diretór ne’e fó hanoin.
Enkuanntu daudaun ne’e estoke ba apoia emerjénsia sufisiente hela iha armazein Servisu Munisipál Protesaun Sivíl, Jestaun Risku Dezastre, Soso, Maliana, inklui tenda atu halo evakuasaun ba vítima afetadu dezastre naturál.
Notísia relevante: Autoridade Protesaun Sivíl asegura vítima inundasaun 131 iha salaun Caicoli
Jornalista: Sérgio da Cruz
Editór: Evaristo Soares Martins
