DILI, 10 janeiru 2024 (TATOLI) – Sekretariu Estadu Protesaun Sivíl (SEPS), liuhosi Autoridade Protesaun Sivíl (APC, sigla Portugés) asegura vítima inudasaun na’in-131 ne’ebé kauza hosi udan bo’ot, horisehik, durante oras rua, hahú 15:00-17:00 otl, ,iha salaun Autoridade Protensaun Sivíl iha Caicoli.
Prezidente Autoridade Protesaun Sivíl, Superintendente Polísia Ismael Babo, informa vítima ne’ebé asegura ona ne’e pertense hosi komunidade sira uha área Caicoli, postu administrativu Vera Cruz munisípiu Dili.
“Vitima hirak ne’e kompostu hosi labarik idade 0-16 hamutuk 76, inan fó susun 13, inan isin rua hamutuk neen no ema ho defisiénsia na’in rua, inan feton sira ho idade 16-59 hamutuk 30 no idade 60 ba leten hamutuk 60, ami asegura ona iha salaun Autoridade Protesaun Dili,” Prezidente ne’e relata liuhosi konferénsia imprensa.
Udan ho intensidade forte, nia dehan iha munisípiu Díli kuaze bee nakonu iha estrada laran hanesan dalan Caicoli, Colmera, Comoro Golgota, Balide, Ai-mutin, Fatuhada, Becusse, Tasi-Tolu Quarentina, Bairru-Pite no Surikmas, ne’ebé uma balun afetadu.
“Ita fó ona apoia emerjénsia ba vítima sira ho kolaborasaun Ministériu Saúde, maibé dadus kompletu ba vitíma sira seidauk tanba daudaun halo levantamentu dadus ba vítima afetadu sira iha territóriu nasionál,” nia afirma.
Tuir dadus nian dehan, udan bo’ot ne’e mós estraga uma komunidade rua iha munisípiu Ermera, ha’at iha Covalima, Manatutu mak ai-hanena uma ida no iha munisípiu Manufahi estraga uma ida.
Iha munisipiu Lautém nia dehan ai-monu taka dalan ligasaun postu ba munisípiu, Liquiça no Rejiaun Administrativu Oé-Cusse ai tohar taka dalan públiku, maibé ekipa APC iha kada munisípiu hala’o intervensaun direta hodi rezolve.
Labarik efisienti ida neebe evakua hotu ba edifisiu APC tamba afeta inundasaun iha nia hela fatin, kuarta 10/1/2024. Foto Tatoli/Antonio Daciparu
Daudaun ne’e, nia dehan APC kontinua la’o ba terenu hodi kontinua halo identifikasaun ba vítima inundasaun iha territóriu laran hodi halo levantaemntu dadus kona-ba grau estragu hosi vítima sira hodi Governu bele fó apoiu adekeadu.
Tuir nian, kauza inundasaun ne’e, nia dehan tanba sistema drenajen ladi’ak, lixu so’e arbiru hodi implika valeta intupidu, konstrusaun uma balun taka metin bee dalan, foho lolon laiha ai-horis hodi udan been sulin to’o kapitál.
Notísia relevante: Uma-kain 10-resin iha Becusse Kakeu Laran sofre inundasaun
Jornalista: Jesuína Xavier
Editór : Florencio Miranda Ximenes
